“Chelsi” Nikolas Jeksonni “Barselona”ga taklif qildi

Londonning “Chelsi” klubi senegallik hujumchi Nikolas Jeksonni “Barselona”ga taklif qildi. Bu haqda Fichajes nashri xabar berdi.

Unga ko‘ra, yozgi transfer oynasi vaqti londonliklar bir nechta hujumchi xarid qilgan. Shuning uchun, klub 24 yoshli futbolchini sotishga tayyor. Ayni paytda “Barselona” hujumchi Robert Levandovski bilan bog‘liq vaziyatni diqqat bilan kuzatib turibdi. Agar polshalik futbolchi jamoani tark etsa yoki unga kutilgandek o‘yin ko‘rsata olmasa, klub rahbariyati yangi hujumchi xarid qilishga majbur bo‘ladi. Klubning “short-listi”da Nikolas Jekson ham bor.

Nikolas o‘tgan yillar davomida “Chelsi” safida kutilgani kabi o‘yin ko‘rsata olmadi. Shu bois, klub hujum chizig‘ini kuchaytirish maqsadida 64 million yevroga Joau Pedroni, 35,5 million yevroga Liam Delapni xarid qildi. Natijada Jekson klubning “qora ro‘yxati”ga tushib qoldi.

Ma’lumot uchun, Nikolas Jekson 2023-yilda Ispaniyaning “Vilyarreal” klubidan “Chelsi”ga 37 million yevro evaziga o‘tgan edi. Hujumchi yakunlangan mavsum jami 37 uchrashuvda maydonga tushib, o‘z hisobiga 13 ta gol va 6 ta golli uzatma yozdirib qo‘ydi. Transfermarkt portali futbolchining qiymatini 50 million yevroga baholamoqda.