Fransiyaning “Lion” klubi yarim himoyachisi Rayan Sherki faoliyatini Angliyada davom ettirishi mumkin. Jurnalist Fabrisio Romano xabariga ko‘ra, “Manchester Siti” futbolchini xarid qilish bo‘yicha muzokaralarni boshlagan.
“Shaharliklar” markaziy yarim himoya va hujum orti pozitsiyalarni kuchaytirish ustida ish olib bormoqda. Bu transferlarga klubdagi ayrim futbolchilarning ketishi sabab bo‘lmoqda. Ulardan eng muhimlaridan biri — Kevin De Bryuyne. Klub rahbariyati 33 yoshli belgiyalik futbolchi bilan shartnoma uzaytirmadi. Shu bois “Siti” unga munosib o‘rinbosar qidirmoqda.
Ayni paytda klub bir nechta futbolchilarga, jumladan “Milan” vakili Teyani Reynders va “Nottingem Forest” a’zosi Morgan Gibbs-Uaytga e’tibor qaratgan.
So‘nggi kunlarda esa “Siti” yanada arzon, ammo munosib nomzod sifatida “Lion” futbolchisi Rayan Sherkiga jiddiy qiziqish bildira boshladi. Uning shartnomasida 30–35 million yevro atrofida tovon puli belgilangan. Bu esa nafaqat “Siti”, balki bir qancha APL klublarining ham e’tiborini tortgan.
O‘tgan mavsumda Sherki Liga 1 doirasida 30 ta o‘yinda maydonga tushib, o‘z hisobiga 8 ta gol va 11 ta golli uzatma yozdirib qo‘ygan. Uning “Lion” bilan amaldagi shartnomasi 2026-yil iyun oyida yakunlanadi.
Izoh (0)