Madridning “Real” klubi hujumchisi Kilian Mbappe kelasi mavsumdan yangi raqam ostida o‘ynashi mumkin. Bu haqda Foot Mercato nashri xabar bermoqda.
Manbaga ko‘ra, klub fransuz futbolchisiga Luka Modrich jamoada ketgach, bo‘sh turgan 10-raqamni taklif qilgan. Xorvatiyalik futbolchi 2012-yildan beri “qirollik klubi” sharafini himoya qilib keladi. U 2020-yildan beri 10-raqamga egalik qiladi.
Kilian o‘tgan mavsum “Real” safiga qo‘shilgan va oldingi yillar Karim Benzema harakat qilgan 9-raqam ostida o‘ynab kelayotgan edi. Xabarlarga ko‘ra, futbolchi klubning taklifiga ijobiy munosabat bildirgan va yaqin kunlar ichida bu raqamni qabul qilishi kutilmoqda.
Ma’lumot uchun, Kilian Fransiya terma jamoasida ham 10-raqamli libosda o‘ynaydi. Shuningdek, u “Monako”da 29, “PSJ”da esa 7-raqamda harakat qilgan.
Yakuniga yetgan mavsum Mbappe La Liganing eng yaxshi to‘purariga aylandi. U 34 ta gol urib, “Oltin butsa”ni qo‘lga kiritdi. Uning “Real” bilan qo‘lga kiritgan yagona sovrin — UEFA Superkubogi hisoblanadi.
Izoh (0)