Londonning “Chelsi” klubi Klublar o‘rtasidagi Jahon chempionati finalida Parijning “PSJ” jamoasini yirik hisobda mag‘lubiyatga uchratib, musobaqa g‘olibiga aylandi. Biroq turnirning asl kubogi bilan bog‘liq holat jamoatchilikda qizg‘in muhokamalarga sabab bo‘ldi.
AQSh prezidenti Donald Trampning aytishicha, musobaqaning asl kubogi FIFA prezidenti Janni Infantino taklifi bilan Oq uydagi Oval kabinetda saqlanmoqda. “Chelsi” klubi esa kubok nusxasi bilan taqdirlangan.
Ular menga: ‘Kubok sizda qolsin’, deyishdi. Biz uni Oval kabinetga qo‘ydik. Keyin men: ‘Qachon olib ketasizlar?’ deb so‘radim. Infantino esa: ‘Biz uni olib ketmaymiz. Uni o‘zingizda qoldiring’, deb javob berdi, — dedi Tramp.
Ba’zi OAVlar xabariga ko‘ra, aslida kubokning Oq uyda qolishi bo‘yicha g‘oya Trampning o‘zidan chiqqan, Infantino esa bunga qarshi chiqmagan.
Eslatib o‘tamiz, turnir kubogi mashhur “Tiffany & Co.” kompaniyasi tomonidan ishlab chiqilgan. U 24 karatli oltin bilan qoplangan bo‘lib, 13 xil tilda, jumladan, Brayl yozuvida (ko‘zi ojiz yoki zaif ko‘ruvchi insonlar uchun mo‘ljallangan) ishlangan ham yozuvlar bilan bezatilgan.
Izoh (0)