“Barselona” klubi “Arsenal” yarim himoyachisi Tomas Parti transferi bo‘yicha muzokara olib bormoqda. Bu haqda The Sun nashri xabar berdi.
Kataloniyaliklar 31 yoshli ganalik futbolchini erkin agent sifatida tarkibga qo‘shib olishga harakat qilmoqda. “Ko‘k-anorranglilar” allaqachon Partining atrofidagi shaxslarga aloqaga chiqqan. Uning “Arsenal” bilan amaldagi shartnomasi iyun oyi oxirida yakunlanadi.
“Barselona” bosh murabbiyi Hansi-Diter Flik Tomas Partining o‘yinlarini yoqtiradi, shu bois uni katta xarajatlarsiz tarkibga jalb qilib, jamoasining yarim himoya chizig‘idagi o‘yinlarini yanada kuchaytirishni istamoqda.
Futbolchiga Saudiya Arabistonining bir nechta klublari ham qiziqish bildirmoqda, biroq Tomas Osiyo qit’asiga ketishga shoshilmayapti.
Parti uchun La Liga begona emas. U “Malyorka”, “Almeriya” va “Atletiko” kabi jamoalar sharafini himoya qilgan.
Tomas Parti 2020-yildan beri “Arsenal” safida harakat qilib kelmoqda. U joriy Angliya Premyer Ligasi doirasidagi 35 ta o‘yinda maydonga tushib, o‘z hisobiga 4 ta gol va 2 ta golli uzatma yozdirib qo‘ygan. Transfermarkt portali yarim himoyachining qiymatini 14 million yevroga baholamoqda.
Izoh (0)