O‘zbekiston terma jamoasi yarim himoyachisi Abbos Fayzullayevning Moskvaning “SSKA” klubidan Turkiyaning “Istanbul Bashakshehir” jamoasiga o‘tishi rasman amalga oshdi. Avvalroq futbolchining transferi bo‘yicha to‘lov jarayonida texnik muammolar yuzaga kelgani tufayli u yangi jamoasida debyut qila olmayotgani haqida xabarlar tarqalgan edi.

“SSKA” klubi matbuot xizmatining ma’lum qilishicha, turk jamoasi transfer uchun belgilangan mablag‘ni to‘liq to‘lagan. Shundan so‘ng rossiyaliklar darhol futbolchining xalqaro transfer sertifikatini yuborishgan.
Pul mablag‘i tushgach, biz shartnomaga muvofiq transfer sertifikatini jo‘natdik va bitim to‘liq yakunlandi. “Bashakshehir” klubiga ham, Abbos Fayzullayevning agenti German Tkachenkoga ham minnatdorchilik bildiramiz. Abbosning “SSKA”ga kelishi klub uchun har tomonlama foydali bo‘ldi. Unga yangi bosqichda muvaffaqiyatlar tilaymiz, — dedi “SSKA” direktori Kirill Breydo.
Fayzullayevning “Bashakshehir” safidagi debyuti 21-avgust kuni bo‘lib o‘tishi kutilmoqda. Unda turk klubi UEFA Konferensiyalar Ligasi doirasida Ruminiyaning “Universitatya” jamoasiga qarshi maydonga tushadi. 24-avgust kuni esa Turkiya Superligasi doirasida yana bir o‘zbekistonlik futbolchi — Husniddin Aliqulov harakat qilayotgan “Rizespor” bilan o‘yin rejalashtirilgan.
Izoh (0)