Angliyaning “Manchester Siti” klubi “PSJ” darvozabon Janluiji Donnarumma bilan shartnomani imzolashni istamoqda. Italiyalik jurnalist Janluka Di Marsioning xabar berishicha, parijliklar va futbolchi o‘rtasidagi muzokaralar muvaffaqiyatsiz yakunlangan va Klublar o‘rtasidagi Jahon chempionatidan tomonlar yana bir shartnoma uzaytirish uchun harakat qilib ko‘radi. “Siti” rahbariyati esa “PSJ” va futbolchi o‘rtasidagi kelishmovchilikdan foydalanib qolib, unga yaxshilangan shartnoma taklif qilmoqchi.
Manbaga ko‘ra, Klub ustozi Xosep Gvardiola italiyalik kiperni o‘z jamoasida ko‘rishni istamoqda. Sababi, joriy mavsum “shaharliklar” darvoza chizig‘ida ko‘plab muammolar paydo bo‘ldi. Donnarumma esa ushbu kamchilikni yopishi mumkinligi aytilmoqda.
“PSJ” rahbariyati Chempionlar Ligasidagi g‘alabada muhim hissa qo‘shganiga qaramay, 26 yoshli darvozabonning oylik maoshini oshirishni istamayapti. Shu bilan birga, mavjud shartnoma shartlarini ham yomonlashtirmoqchi emas. Uning hozirgi shartnomasi 2026-yil yozida yakunlanadi. Ma’lum bo‘lishicha, Donnarummaning “PSJ”dagi yillik maoshi 12,7 million yevro etib belgilangan.
Ma’lumot uchun, Donnarumma o‘tgan mavsum parijliklarning barcha turnirlar doirasidagi 40 ta uchrashuvda maydonga tushib, 12 bellashuvda o‘z darvozasi dahlsizligini saqlab qolgan. Transfermarkt portali posbonning qiymatini 35 million yevroga baholagan.
Izoh (0)