46 yoshli filippinlik afsona, sakkizta vazn toifasida sobiq jahon chempioni Menni Pakyao WBC yarim o‘rta vazn versiyasi chempioni, amerikalik Mario Barriosga qarshi jangdan so‘ng professional faoliyatini davom ettirishga tayyor ekanini ma’lum qildi.
Menni BoxingScene nashriga bergan intervyusida o‘zini pul qiziqtirmasligi va ikkinchi hamda uchinchi darajadagi bokschilarga qarshi ringga ko‘tarilishni istamasligini aytdi:
Gap yana jang qilishni xohlayotganimda emas, balki tayyorgarlikka yetarli vaqt ajratilishida. Meni faqat to‘liq va sifatli tayyorgarlik qiziqtiradi, chunki ikkinchi yoki uchinchi darajadagi raqiblar bilan faqat pul uchun jang qilish niyatim yo‘q. Men birinchi darajali bokschilar bilan jang qilib, ular ustidan g‘alaba qozonishni xohlayman.
Shuningdek, u yana bir-ikki oy shug‘ullansa, 100 foiz tayyor bo‘lishini ma’lum qildi:
Hozirda ham yaxshi sport formasidaman. Yana bir-ikki oy jiddiy tayyorgarlik ko‘rsam, har qanday raqibga qarshi 100 foizga tayyor bo‘la olaman.
Eslatib o‘tamiz, AQSHning Las-Vegas shahridagi “MGM Grand” arenasida o‘tgan boks oqshomida Pakyao 30 yoshli Mario Barriosga (29-2-1) qarshi yarim o‘rta vazn toifasida WBC kamari uchun ringga chiqdi. 12 raund davom etgan jang hakamlarning bo‘lingan qarorida durang bilan yakunlandi. Bu filippinlik bokschining so‘nggi to‘rt yildagi ilk jangi edi.
Izoh (0)