Ukrainalik charm qo‘lqop ustasi, super og‘ir vazn toifasining mutlaq jahon chempioni Oleksandr Usikning navbatdagi jangi haqida muhim yangiliklar paydo bo‘ldi. The Ring Magazine nashrining xabar berishicha, Saudiya Arabistonining yirik kompaniyalari — Riyadh Season va Sela — Usik hamda yangi zelandiyalik bokschi Jozef Parker o‘rtasidagi jangni tashkil etish borasida qiziqish bildirmaganini ma’lum qilgan.
Avvalroq Jahon boks tashkiloti (WBO) mazkur jangni rasmiylashtirgan va ikki bokschiga 30 kun ichida shartnoma bo‘yicha kelishuvga erishish uchun ruxsat bergan edi. Ammo Saudiya tomonining befarqligi bu jangning o‘tkazilishi borasida shubhalarni kuchaytirmoqda.
Oleksandr Usik ayni damda super og‘ir vazn toifasidagi barcha asosiy chempionlik kamarlarini birlashtirgan — u mutlaq jahon chempioni hisoblanadi. Uning potentsial raqibi Jozef Parker esa WBO’ning vaqtinchalik chempioni maqomiga ega. Agar jang tashkil etilsa, bu og‘ir vazn toifasidagi navbatdagi unifikatsiya jangi bo‘lishi mumkin edi. Biroq homiylarning orqaga chekinishi mazkur jangning taqdirini noaniqlik ostida qoldirmoqda.
Ma’lumot uchun, 2025-yil 19-iyul kuni Oleksandr Usik Londonning “Uembli” stadionida britaniyalik raqibi Daniel Dyubuaga qarshi ringga chiqdi. Ushbu jangda Usik beshinchi raundda raqibini nokautga uchratib, o‘z chempionlik kamarlarini yana bir bor muvaffaqiyatli himoya qildi.
Oleksandr Usik professional faoliyati davomida 24 ta jang o‘tkazib, ularning barchasida g‘alaba qozongan va hozirgacha mag‘lubiyat nimaligini bilmayapti. Jozef Parker esa 39 ta jangda qatnashib, 36 marta g‘alaba (shundan 24 tasi nokaut bilan) va 3 marta mag‘lubiyat qayd etgan.
Izoh (0)