Yaponiyalik Uta Abe Budapeshtda o‘tayotgan judo bo‘yicha jahon chempionatida g‘alaba qozonganidan so‘ng, o‘zbekistonlik Diyora Keldiyorova haqida gapirdi.
Uta Abe Diyoradan revansh olishni istayotganini va uning tezroq katta sportga qaytishiga umid qilayotganini aytdi:
Men uchun juda og‘ir yil bo‘ldi. Ammo qat’iyatim va kuchli irodam evaziga natijaga erishdim deb o‘ylayman. Hali oldinda uzoq yo‘l bor, ko‘proq mehnat qilishim kerak. Diyora Keldiyorova bu yerda bo‘lmaganidan afsuslandim. Uning qaytishiga umid qilaman, men undan revansh olmoqchiman, dedi Uta Abe.
Eslatib o‘tamiz, yaponiyalik sportchi Parij-2024 Olimpiadasida o‘zbekistonlik dyuzdochiga imkoniyatni boy berib, musobaqani erta tark etgan edi.
Diyora Keldiyorova sportdan vaqtincha tanaffus olgan. U 2025-yilda ona bo‘lishi kutilmoqda.
Ma’lumot uchun, Abe Vengriya poytaxti Budapeshtda o‘tayotgan jahon chempionatida -52 kg vazn toifasida g‘alaba qozonib, o‘zining beshinchi chempionligini qo‘lga kiritdi. 24 yoshli Uta Abe Parijda o‘tgan yozgi Olimpiadadagi mag‘lubiyatdan so‘ng ilk yirik musobaqada g‘alaba qozondi. Finalda u Tokio-2020 Olimpiadasi chempioni, kosovolik Distria Krasnikini ippon evaziga mag‘lub etdi.
Izoh (0)