Mamlakatda faoliyat ko‘rsatayotgan korxona va tashkilotlar soni bir yil ichida 7 foizga ko‘paydi. Bu haqda Statistika qo‘mitasi maʼlum qildi.
2025-yil 1-iyul holatiga ko‘ra, respublikada faoliyat ko‘rsatayotgan korxona va tashkilotlar soni 463 mingtani tashkil etdi. Shundan 393,4 mingtasi (85 foizi) kichik korxona va mikrofirmalar hissasiga to‘g‘ri keldi.
Taqqoslash uchun, 2022-yilning mos davrida mamlakatda jami 561 386 korxona va tashkilotlar ishlagan. Ularning 497 293 tasi kichik biznes subyektlari bo‘lgan. 2023-yil iyulida 477 722 ta, 2024-yil mos davrida 455 609 ta korxona va tashkilotlar faoliyat yuritgan.
Joriy yilgi ko‘rsatkichlarga ko‘ra, hududlar bo‘yicha eng ko‘p korxona Toshkent shahrida ro‘yxatga olingan — 103,9 mingta. Shundan 91 916 tasi kichik biznes subyektlaridir. Eng kam ko‘rsatkich esa Sirdaryo viloyatida — 12 027 ta.
Faoliyat yo‘nalishlari bo‘yicha eng ko‘p korxonalar savdo sohasida — 32,7 foiz. Sanoat (12,7 foiz) va qishloq xo‘jaligi (7,5 foiz) ulushi ham katta.
Tijorat tashkilotlari orasida eng ko‘pi mas’uliyati cheklangan jamiyatlar bo‘lib, ularning soni 306 mingtani tashkil etdi. Shuningdek, 48,8 mingta xususiy korxona, 38,2 mingta oilaviy korxona va 649 ta aksiyadorlik jamiyati faoliyat yuritmoqda.
Mamlakatda xorijiy investitsiyali korxonalar soni ham ko‘paygan. Bir yil ichida ularning soni 2 800 tadan ko‘proqqa oshgan. Eng ko‘p xorijiy korxonalar Xitoyga tegishli — 4 192 ta. Shu bilan birga, Rossiya, Turkiya, Qozog‘iston, Afg‘oniston va Janubiy Koreya korxonalari ulushi ham nisbatan katta.
Izoh (0)