Joriy yil 1-maydan O‘zbekistonda gaz va elektr energiyasi narxi qimmatlashdi. Bosh vazir o‘rinbosari, iqtisodiyot va moliya vaziri Jamshid Qo‘chqorov parlamentdagi chiqishida tariflar past darajada oshirilganini aytdi. “Oyiga 300 kVt/soat elektr isteʼmoli uchun narx 20 ming so‘mga oshdi. Mobil aloqa xizmatiga ham kamida 35 ming so‘m to‘lanadi”, deya taʼkidladi hukumat rasmiysi.
Joriy yil 3-iyun kuni Toshkent shahrida Oliy Majlis Qonunchilik palatasining navbatdagi yig‘ilishi o‘tkazildi. Majlisda Jamshid Qo‘chqorov chiqish qilib, davlat byudjeti ijrosi yuzasidan maʼlumot berdi. Hukumat rasmiysi so‘zi yakunida o‘zgargan elektr energiyasi tariflari yuzasidan tushuntirish berdi.
Bosh vazir o‘rinbosarining aytishicha, O‘zbekistonda 7,6 millionta elektr energiyasi isteʼmolchilari bor. Shundan 70 foizi oyiga 300 kVt/soatgacha tok ishlatadi.
“Tariflar oshirilishida hech qanday jiddiy masala ko‘rmayapmiz. Agar bir oila oyiga 300 kVt/soat tok isteʼmol qilsa, to‘lov miqdori avvalgidan 20 ming so‘mga oshadi, yaʼni 180 so‘mdan 200 ming so‘mga. Respublikada mobil aloqa xizmati uchun bitta abonent kamida 35 ming so‘m to‘laydi. Bir oilada uchta telefon bor. Energiya tariflari past miqdorda oshirilgan bo‘lishiga qaramay, ijtimoiy yordam masalalari ham ko‘zda tutilyapti”, dedi vazir.
Jamshid Qo‘chqorov masalani tushuntirar ekan, agar oyiga 500 kVt/soat elektr toki ishlatilsa, to‘lov miqdori avvalgidan oshmasligini aytdi.
“200 kVt/soatgacha bo‘lgan elektr energiyasi tarifi 450 so‘mdan 600 so‘mga oshirildi. Bunda isteʼmolchi avvalgidan 30 ming so‘m ko‘proq to‘laydi. Ammo 201 kilovattdan 500 kilovattgacha bo‘lgan narx 900 so‘mdan 800 so‘mga pasaytirildi. O‘rtacha oila oyiga 500 kVt/soat elektr isteʼmol qildi deylik. Narx pasaygani hisobiga uning oylik xarajati o‘zgarmaydi. Yaʼni u oldin 500 kilovatt uchun 360 ming so‘m to‘lagan bo‘lsa, hozir ham shuncha to‘laydi”, dedi vazirlik rahbari.
Jamshid Qo‘chqorov bergan maʼlumotga ko‘ra, mamlakatda oyiga 1000 kilovatt elektrdan foydalanadigan xonadonlar soni kam.
Avvalroq 2024-yil may-dekabr oylarida elektr energiyasi isteʼmoli 2023-yil mos davriga nisbatan 10,6 foizga kamayib, 1,3 mlrd kVt/soat tejalgani xabar qilingandi.
Izoh (0)