Hindistonda yashovchi Nisha ismli ayol Instagram sahifasidagi ikki nafar obunachisini yo‘qotgani sababli eridan arazlab ketib, uning ustidan politsiyaga arz qildi. Bu haqda The Independent nashri xabar berdi. Ayolning so‘zlariga ko‘ra, uy ishlari ko‘pligi sababli u video kontent yaratishga vaqt topolmagan.
Turmushga chiqishidan avval Nisha ijtimoiy tarmoqlarda faol bo‘lgan: u har kuni Instagram’da kamida ikki ta qisqa video joylab borgan. Ammo erining iltimosiga ko‘ra, u ijtimoiy tarmoqlarda o‘tkazadigan vaqtini qisqartirgan va ko‘proq uy yumushlariga vaqt ajrata boshlagan. Natijada ikki obunachisini yo‘qotgan Nisha eriga nisbatan norozilik bildirgan.
Ayol bu borada ayollar masalalari bilan shug‘ullanuvchi mahalliy politsiya bo‘limiga murojaat qilgan:
“Mening obunachilarim soni kamaydi, chunki erim doimiy ravishda meni idish-tovoq yuvish va uy yig‘ishtirish ishlari bilan band qilib qo‘ydi. Video tayyorlashga vaqtim qolmadi”, deya tushuntirgan u politsiyaga.
Huquq-tartibot organlari xodimlari er-xotin bilan bir necha bor tushuntirish ishlarini olib borgan. Natijada Nisha arizasini qaytarib olgan, biroq kelib chiqqan mojaro sababli ayolning eri ishidan ayrilgan va hozirda yangi ish qidirmoqda.
Izoh (0)