Malikalar ko‘ylagi, brilliantlar va 11 qavatli tort: livanlik dizayner Eli Saabning o‘g‘li uylandi

Livanda yil to‘yi bo‘lib o‘tdi — oqshom liboslari bo‘yicha mashhur dizayner Eli Saabning o‘g‘li uylandi. Livanlik modelyerning o‘rtancha o‘g‘li Selio va uning sevgilisi — 28 yoshli Zeyn Kutami marosimni katolik an’analari bo‘yicha o‘tkazdi. Tantana uch kun davom etdi. Kelin ikkita obrazda namoyon bo‘ldi, ulardan biri 700 soatdan ortiq vaqt davomida yaratilgan.

Kelin Zeyn iordaniyalik bo‘lib, Cosmopole Consultancy kompaniyasida ijtimoiy media akkauntlari bo‘yicha menejer bo‘lib ishlaydi. Selioning aytishicha, qizning go‘zalligi, kuchli shaxsiyati va hayotga bo‘lgan yuqori standartlari uni darhol o‘ziga rom etgan. “Meni ko‘proq hayratga soladigan fazilati — uning o‘z qadriyatlariga sodiqligidir. U hayotdan nimani xohlashini aniq biladi va o‘z qarorlarini katta ishonch va xotirjamlik bilan himoya qiladi”, degan u intervyularning birida.

Qiz bo‘lajak turmush o‘rtog‘i bilan to‘rt yil avval BAAda tanishgan. O‘tgan yilning yozida juftlik unashtirilganini e’lon qildi — Selio sevgilisiga brilliant uzuk sovg‘a qilib, uning qo‘lini so‘radi.

Zeyn Kutami marosimda qaynotasi Eli Saab tomonidan yaratilgan, 780 soat vaqt davomida tikilgan va orzudagi obrazga aylangan nikoh ko‘ylagida paydo bo‘ldi.

Bu haqiqiy malikalar libosi edi — uzun yengli, serhasham shleyfli, bor uzunligi bo‘ylab hashamatli kumush kashtalar bilan bezatilgan va kaskadli tyul fata bilan to‘ldirilgan ajoyib siluet. Kichkina brilliant diadema esa soch turmagini bezab turardi.

Kelin otasi hamrohligida mehrobga chiqdi. Ibodatxonadagi marosimdan so‘ng, mehmonlar to‘y ziyofatiga yo‘l olishdi.

To‘yning kechki bazmi uchun yaratilgan ikkinchi libos ham birinchisidan qolishmasdi. Korset va ko‘ylakning o‘zi mis-pushti kristallar, payetkalar va romb shaklidagi yarim shaffof toshlardan yasalgan murakkab kashtalar bilan bezatilgan bo‘lib, yaltiroq effektni yaratardi.

Tantanada turk aktrisasi Hande Erchel sevgilisi Hakan Sabanji bilan ishtirok etgan. Xabarlarga ko‘ra, tadbirda balandparvoz nutqlar bo‘lmagan, to‘y shunchaki mehmonlar uchun mintaqalar bilan madaniy tanishuv tarzida o‘tkazilgan.

Mehmonlar 11 qavatli, fil suyagi rangidagi tabiiy gullar bilan bezatilgan ajoyib to‘y tortidan va shamlar bilan bezatilgan to‘kin dasturxondagi taomlardan bahramand bo‘lishdi.

Kecha ochiq havoda, dengiz sathidan 1500 metr balandlikda o‘tdi, u yerdan tog‘lar va O‘rta Yer dengizining ajoyib manzarasi ko‘rinib turardi.