Janubiy Kaliforniyada hobbitning uyini eslatadigan noodatiy turargoh joylashgan. Ushbu uyni 1979-yilda Devidsonlar oilasi uchun rassom Jeyms Habbell me’mor Robert Teyl bilan birgalikda loyihalashtirgan. Uning maydoni 74 kvadrat metr bo‘lib, ikkita yotoqxona va bitta hammom mavjud.
Hammasi Devidsonlar 26 sotix yer uchastkasini sotib olganidan boshlandi. Ular mahalliy tabiatdan ilhomlanib, o‘zlari va to‘rt qiz farzandi bilan birga yashashi mumkin bo‘lgan boshqa uylarga o‘xshamaydigan g‘ayrioddiy uy yaratishni xohlashdi. Ular Habbelga bejiz murojaat qilishmagan — me’mor va vitrajchi o‘zining “hobbit uylari” bilan mashhur va bu loyiha ulardan biri bo‘ldi.
Devidsonlar tayyor loyihadan foydalanib uyni o‘zlari qurishdi va to‘rt yilda bitirishdi. Uyning oval konstruksiyasi armatura, sim to‘r va tunukadan iborat. Markazda ertaknamo kamin joylashgan bo‘lib, uning atrofida oila sovuq oqshomlarda yig‘iladi.
Interyer yog‘och mebellar, ajoyib rangli mozaika, vitrajlar, turli xil teksturalar, mis va po‘lat qismlar, bolg‘alangan panjaralar bilan bezatilgan.
Devidsonlar uyi rassomning g‘oyasini to‘liq amalga oshira olgan kam sonli uylardan biridir. Uy haqiqatan ham sehrli ko‘rinadi, ayniqsa, hamma narsa qo‘lda yaratilgani, har bir detalning o‘z o‘rni borligi kishini o‘ziga maftun etadi.
Hududning o‘zi ham ertaknamo — u yam-yashil daraxtlar va butalar, gullar bilan o‘ralgan. Qolaversa, bu yerdan so‘qmoq bo‘ylab soyga chiqish mumkin.
Izoh (0)