Niderlandiyaning Tiler kompaniyasi Compact nomli quvvatlash qurilmasini taqdim etdi. Ushbu innovatsion tizim har qanday elektr velosipedini simsiz tarzda zaryadlash imkonini beradi. U ikki asosiy qismdan iborat: yerga o‘rnatiladigan dok-stansiya va maxsus tayanch.
Tayanch ichiga elektr simlari o‘rnatilgan bo‘lib, ular velosiped akkumulyatoriga ulanadi. Tiler kompaniyasi ushbu moslama Bosch, Yamaha, Bafang kabi yirik ishlab chiqaruvchilarni ham o‘z ichiga olgan 75 foiz velosipedlarga mos ekanini bildirgan. Qurilmaning og‘irligi 2 kilogramm bo‘lib, IP67 standarti bo‘yicha suv va changdan himoyalay oladi.
Betonga o‘rnatilishi mumkin bo‘lgan zaryadlash maydonchasi yupqa shaklda ishlab chiqilgan. U yomg‘ir, qor, issiq havo va boshqa transport vositalarining g‘ildirak bosimiga bardosh bera oladi. Velosipedchi velosipeddan tushib, tayanchni dok-stansiyaga qo‘yishi bilan quvvatlash avtomatik tarzda boshlanadi. Bu vaqtda maydonchada oq rangli indikator yoqiladi. Tizim 150 Vt quvvatda zaryad oladi, 500 Vt/soat sig‘imli akkumulyatorni to‘liq quvvatlash uchun 3,5 soat vaqt talab etiladi.
Tiler kompaniyasi hozirgacha Yevropaning turli hududlarida, xususan, velosiped ijarasi, mehmonxonalar va yetkazib berish xizmatlari yonida 200 dan ortiq quvvatlash joylarini o‘rnatgan. Ushbu texnologiya amaliyotda samaradorligini ko‘rsatgan: Myunxendagi birgina yetkazib berish xizmati bu orqali har oyda 1 250 yevro tejalishini qayd etgan.
Compact tizimini hozirda 280-300 AQSH dollari evaziga oldindan buyurtma qilish mumkin. To‘plamga tayanch qismi va zaryadlash maydonchasi kiradi. Chakana savdolar 2026-yil yozida boshlanishi rejalashtirilgan.
Izoh (0)