Pentagon Ilon Maskning sun’iy intellekt chatboti Grok’dan foydalanish uchun 200 million dollarlik shartnoma imzoladi. Bu haqda BBC xabar berdi.
Maskning xAI kompaniyasi tomonidan 14-iyul kuni e’lon qilingan ushbu shartnoma “Grok hukumat uchun” dasturining bir qismi hisoblanadi. AQSH Mudofaa vazirligining ta’kidlashicha, hukumat sun’iy intellekt vositalaridan kengroq foydalanishga harakat qilmoqda.
Yangi bitim AQSH hukumat idoralariga chatbotning eng so‘nggi versiyasi Grok 4 ga ulanish imkonini beradi va milliy xavfsizlikdan foydalanish uchun maxsus vositalarni taqdim etadi.
Pentagon, shuningdek, Anthropic, Google va OpenAI kompaniyalari bilan ham xuddi shunday shartnomalar imzolanishini ochiqlagan. Ularning har biri 200 million dollardan yuqori bo‘lishi rejalashtirilgan.
“Sun’iy intellektdan foydalanish jangchilarimizni qo‘llab-quvvatlash va dushmanlarimiz ustidan strategik ustunlikni saqlab qolishda yordam beradi”, dedi AQSH hukumati vakili.
Yaqinda Grok’da Adolf Gitlerni maqtovchi postlar tarqalib, bu ko‘pchilikning noroziligiga sabab bo‘lgan edi. Ilon Mask muammo hal qilinayotganini bildirgan.
Grok 2023-yil oxirida ommaga taqdim etilgan. U boshqa sun’iy intellekt chatbotlariga qaraganda filtrlanmagan muqobil sanaladi. Bot allaqachon X ijtimoiy tarmog‘iga integratsiya qilingan.
Izoh (0)