Xitoyning Mirror Me startapi tomonidan yaratilgan robot it 100 metr masofani atigi 13 soniyada yugurib o‘tishga muvaffaq bo‘ldi. Bu hozirgacha robotlar orasida qayd etilgan eng yuqori natija hisoblanadi.
Black Panther II nomli robot it sekundiga 9,7 metr tezlikka yetdi va amerikalik muhandislar yaratgan tezyurar WildCat robotidan o‘zib ketdi. WildCat maksimal 8,8 m/s tezlikda harakatlana oladi.
Hozircha rasmiy jahon rekordi Koreya yuqori texnologiyalar instituti talabalari tomonidan ishlab chiqilgan robot itga tegishli bo‘lib qolmoqda — u 100 metr masofani deyarli 20 soniyada bosib o‘tgan.
Mirror Me asoschisi Jin Yunbinning aytishicha, kompaniya bu natijani Ginnesning rekordlar kitobiga kiritish uchun “kerakli vaqt kelganda” ariza topshiradi. Unga ko‘ra, startapning maqsadi 2026-yilga kelib soniyasiga 10 metr tezlikda yugura oladigan ikki oyoqli robot yaratish hamda 2030-yilgacha esa shaxsiy yordamchi sifatida ishlay oladigan to‘liq gumanoid robotni ishlab chiqishdir.
Avvalroq Xitoyda ilk bor robotlar ishtirokida futbol turniri o‘tkazilgan edi.
Izoh (0)