Eurobike 2025 ko‘rgazmasida Kamingo kompaniyasi oddiy velosipedni tezda elektr velosipedga aylantirish imkonini beruvchi mitti motorni taqdim etdi. Birinchi marta motorni velosipedga o‘rnatish taxminan uch daqiqa davom etadi, shundan so‘ng qurilmani tom maʼnoda soniya ichida olib tashlash va qayta o‘rnatish mumkin.
Kamingo atigi 2,27 kg vaznga ega bo‘lib, uchta komponentdan iborat: motor, batareya va kontroller. Doimiy magnitli sinxron dvigatel 750 Vt eng yuqori quvvatni beradi. 266 Vt/soat sig‘imli akkumulyator suv idishi shaklida ishlab chiqarilgan va 90 km gacha masofani bosib o‘tishni taʼminlaydi.
Tizim uchta ish rejimini — motorni o‘chirish, pedallarni burashda yordam berish va to‘liq elektrda yurishni qo‘llab-quvvatlaydi. Kichik rangli displeyli kontroller rulga mahkamlanadi va rejimlarni almashtirish imkonini beradi. Qo‘shimcha xavfsizlik uchun qurilma yiqilish va siqilish sensorlari bilan jihozlangan. Bundan tashqari, unda rekuperativ tormozlash funksiyasi mavjud — u tormozdan foydalanganda ajralib chiqadigan energiya hisobiga akkumulyatorni zaryadlash imkonini beradi.
Ushbu yangi mahsulotni oldindan buyurtma qilish narxi 349 dollardan boshlanadi. Dastlabki yetkazib berish esa 2025-yil dekabr oyiga rejalashtirilgan.
Izoh (0)