Britaniyalik ayol erining xiyonatini aqlli tish cho‘tkasi yordamida fosh qildi. Bu haqda xususiy detektiv Pol Jons maʼlum qildi. Uning mijozi gadjet uchun ilovada oila aʼzolarining tish tozalash faolligi aks etgan g‘ayrioddiy seanslarni payqab qoldi.
“Vaqt o‘tishi bilan mijoz uning turmush o‘rtog‘ining tish tozalash tarixi g‘ayrioddiy vaqtlarda, u ishda bo‘lishi kerak bo‘lgan paytlarda qayd etilganini payqadi. Dastlab, bu unchalik ahamiyatli emasdek tuyuldi, juma kunlari ertalab tish tozalangani ayolda darhol xavotir uyg‘otmadi. Ammo qonuniyat aniq edi. Har hafta, bir vaqtda bu takrorlangan. Tabiiyki savol tug‘iladi: agar uning eri bu paytda ishda bo‘lishi kerak bo‘lsa, qanday qilib uyda tishlarini tozalashi mumkin”, deya bo‘lishdi Jons.
Maʼlum bo‘lishicha, er uch oydan beri juma kunlari ishlamagan ekan.
“Va shu vaqt ichida u ishxonadagi hamkasbi bilan ishqiy munosabatda bo‘lib, uni juma kuni, xotini va bolalari uyda bo‘lmaganida, uyiga taklif qilgan. Biz xiyonat matnli xabarlar yoki elektron pochta orqali fosh bo‘ladi deb o‘ylashga moyilmiz, biroq tish cho‘tkalari, ovozli yordamchilar va boshqa aqlli qurilmalar haqiqatni jimgina saqlashi mumkin. Ma’lumotlar aldamaydi. Ular vaqt belgisiga ega, ko‘pincha joylashuvga bog‘langan va hissiyotsiz bo‘ladi. Qurilma kimningdir soat 9:00 da ishni boshlashi kerak bo‘lgan paytda ertalab soat 10:48 da tish yuvganini qayd etsa, buni izohlab berish juda mushkul bo‘ladi”, deya xulosa qildi detektiv.
Izoh (0)