Joriy yil 21-iyul kuni Gollivudda Ilon Maskning uzoq kutilgan loyihasi — Tesla Diner & Drive-In restorani rasman ish boshladi. Retro-futuristik uslubda bezatilgan bu innovatsion maskan nafaqat restoran, balki avtomobil haydovchilari uchun kinoteatr, quvvatlash stansiyasi va texnologik tajriba maydonidir.
Restoran haqida
Tesla Diner tashqi ko‘rinishidan 1950-yillardagi klassik Amerika tamaddixonalari ko‘rinishida yaratilgan. Biroq uning interyeri zamonaviy texnologiyalar bilan to‘la. Mehmonlarni Tesla’ning gumanoid roboti — Optimus kutib oladi, ba’zan u popkorn tarqatishda xizmat qiladi.
Buyurtmalar Tesla mashinalarining ekranlari orqali beriladi, tizim esa geolokatsiya yordamida mijoz mashinasi 15 daqiqa oldin yetib kelishini aniqlab, taomni tayyorlab qo‘yadi.
Foto: Reddit
Avto kinoteatr va elektr quvvatlash shoxobchasi
Tesla Diner ikkita yirik LED ekranga ega bo‘lib, avtomobildan tushmasdan turib kino ko‘rish imkonini beradi. Ekranlarda 30 daqiqa davom etadigan qisqa videokontentlar namoyish qilinadi. Shuningdek, restoran hududida 80 ta avtomobil uchun mo‘ljallangan Supercharger zaryadlash stansiyasi ham joylashgan.
Restoran ichidagi kichik muzey
Restoranda Tesla tarixiga oid eksponatlar va turli suvenirlar namoyish etilgan. Shuningdek, maxsus do‘konda Optimus robot shakllari, Tesla logotipli futbolkalar va kepkalarni xarid qilish mumkin.
Ilon Mask Tesla Diner’ni “Los-Anjelesdagi eng zo‘r joylardan biri” deb atadi va kelajakda kompaniya bunday restoranlarni butun dunyo bo‘ylab eng yirik shaharlarda zaryadlash stansiyalari bilan birgalikda ochishi mumkinligini ma’lum qildi.
Ilk bor Mask Tesla restoranini ochish niyati borligini 2018-yilda bildirgan. Los-Anjelesdagi Tesla Diner qurilishi esa 2023-yil kuzida boshlangan.
Izoh (0)