Bel sohasidagi og‘riq, ayniqsa egilish yoki og‘ir yuk ko‘tarish paytida seziladigan noqulaylik umurtqalar orasidagi churraning rivojlanayotganidan dalolat berishi mumkin. Bu holatning yana bir belgisi — belda taranglik hissi va qotib qolishidir, deya tushuntirdi osteopat Dmitriy Simkin “Gazeta.Ru” nashriga bergan intervyusida.
Bel sohadagi og‘riq faqat to‘satdan yuzaga keladigan jismoniy zo‘riqish paytida emas, balki uzoq vaqt bir holatda turish natijasida ham paydo bo‘ladi. Aynan shu sababli haydovchilar ko‘pincha beldagi og‘riqdan shikoyat qilishadi, chunki ular ko‘p vaqtini o‘tirgan holatda o‘tkazadi.
Ba’zida churra hech qanday tashqi alomat bermasligi ham mumkin. Bu paytda u hali kichik bo‘ladi yoki umurtqaga yaqin sohadagi nerv tolalarini siqmayotgan bo‘ladi. Shuningdek, churra hosil bo‘lishidan oldingi bosqich — protruziya vaqtida ham kasallik belgilari sezilmaydi. Chunki bu paytda disklar oralig‘i cho‘zilgan bo‘ladi, biroq uning ichki qismidagi jelesimon moddasi tashqariga ko‘p chiqmagan bo‘ladi.
Mutaxassisning aytishicha, churra og‘rig‘i to‘satdan: oddiy egilish yoki keskin harakat paytida kuchayishi mumkin. Bunday holatda birinchi navbatda og‘riqni kamaytirishga e’tibor qaratish kerak. Dori vositalarini faqat shifokor nevropatolog belgilaydi. Odatda davolash og‘riq qoldiruvchi vositalar hamda B guruhi vitaminlarini qabul qilishni o‘z ichiga oladi.
Bundan tashqari, umurtqaga dam berish zarur: ko‘proq yotgan holatda bo‘lish, belga yuklama bermaslik kerak. Og‘riq kuchayganida o‘tirish tavsiya etilmaydi. Yurish mumkin va hattoki foydali, lekin qadam bosishda belni qo‘llab-quvvatlaydigan maxsus korset taqib yurgan holda bo‘lish kerak.
Agar bemor yurishga qiynalsa, to‘rt oyoqlab harakat qilishga ham ruxsat beriladi. Eng muhimi, tana holatini tez-tez o‘zgartirib turishdir. Masalan, biroz vaqt yotish, biroz harakat qilish va yana biroz vaqt to‘rt oyoqlab yurish va hokazo. Bu bel sohasida qon aylanishni yaxshilaydi va shish kuchayishining oldini oladi.
Og‘riq chekingach, e’tiborni davolash va oldini olish choralariga qaratish muhim. Bunga davolovchi jismoniy mashqlar, ignaterapiya, fizioterapiya muolajalari hamda osteopatik yordam kiradi. Profilaktika uchun esa qulay va ergonomik ish joyini tashkil etish, jismoniy zo‘riqishni to‘g‘ri taqsimlash muhim. Bel sohasini qo‘llab-quvvatlovchi korset ham yuklamani kamaytirishga yordam beradi.
Izoh (0)