Qalqonsimon bez patologiyalarida charchoq kundalik hayotning normal davom etishiga xalaqit beradigan darajaga yetishi mumkin. Bu haqda endokrinolog Kamila Tabeyeva “Gazeta.ru”ga bergan intervyusida aytib o‘tdi.
Shifokorning tushuntirishicha, qalqonsimon bez faoliyati pasayganda bemorlarda umumiy holdan toyish kuzatilishi mumkin.
-cebPS619.avif)
“Amaliyotda biz ko‘pincha uyquchanlik, holsizlik, tetiklikning pasayishi, xotiraning susayishi, shishish kabi belgilarga duch kelamiz. Shu bilan birga, charchoq qalqonsimon bez kasalliklarining keng tarqalgan belgisidir. Biroq ko‘pincha bemorlar buni boshqa sabablarga — ish jadvali, mavsumiylik, stress, noto‘g‘ri ovqatlanishga bog‘lashadi. Ular so‘nggi daqiqagacha shifokorga murojaat qilishmaydi, belgi o‘z-o‘zidan o‘tib ketadi deb o‘ylashadi”, dedi u.
Shifokorning so‘zlariga ko‘ra, qalqonsimon bez gormonlarining meʼyordan oshgani, yaʼni tireotoksikoz ham holsizlikni keltirib chiqarishi mumkin, ammo bu holda belgilar qo‘shimcha ravishda yurak urishining tezlashishi, qo‘llarning titrashi va vazn yo‘qotishni o‘z ichiga olishi mumkin. Shuningdek, qalqonsimon bez bilan bog‘liq muammolar tufayli yuzaga keladigan charchoq oddiy charchoqdan farq qiladi.
“Bunday charchoq juda kuchli bo‘lishi mumkin — bemorlar baʼzan boshlarini yostiqdan ko‘tara olmasliklarini aytishadi. Shuningdek, ko‘plab bemorlar odatdagidan ko‘proq uxlayotganlarini sezishadi, lekin baribir o‘zlarini holdan toygan deb o‘ylashadi. Ularda jismoniy mashqlar uchun quvvat yetishmaydi, ertalab o‘rindan turib, kunni boshlash qiyin bo‘lishi mumkin. Bundan tashqari, tez-tez yig‘lash holati ham paydo bo‘ladi”, deb taʼkidladi u.
Mutaxassisning aytishicha, agar siz ilgari tetik bo‘lgan bo‘lsangiz-u, to‘satdan ahvolingiz yomonlashganini sezib qolsangiz, bu endokrinologga murojaat qilish uchun sabab hisoblanadi. Zarur tahlillardan so‘ng mutaxassis sizning holatingiz qalqonsimon bez faoliyatining buzilishi bilan bog‘liq ekanligini aniqlay oladi.
Izoh (0)