Yaponiyada mehmonxonalarda yangi, noodatiy xizmat turi paydo bo‘ldi: endilikda sayohatchilar o‘zlari bilan olib yurgan yumshoq o‘yinchoqlar uchun alohida mini-karavot va pijama buyurtma qilishlari mumkin. Bu trend yoshlar orasida keng tarqalgan odat — yaqin do‘stdek qabul qilinadigan o‘yinchoqlarni sayohatga olib chiqish bilan bog‘liq.
Toyoko Inn mehmonxonalar tarmog‘i ushbu talabga javoban 2025-yil 25-iyundan boshlab yangi xizmatni joriy etdi. Mehmonlar atigi 300 iyen (taxminan 2 dollar) to‘lab, o‘yinchoqlari uchun kichik karavot so‘rashlari yoki bepul taqdim etiladigan mini-pijamalarni olishlari mumkin.
Yaponiyada yoshlar orasida yumshoq o‘yinchoqlarni o‘ziga xos “sayohatdagi sherigi” sifatida qabul qilish urf bo‘lgan. Ba’zilar o‘yinchoqlarni shaffof ryukzaklarda olib yuradi, boshqalar esa mehmonxona, restoran va diqqatga sazovor joylarga ham qo‘lida o‘yinchoqsiz tashrif buyurmaydi. Instagram, TikTok va boshqa ijtimoiy tarmoqlarda bu boradagi suratlar va videolar millionlab tomosha qilinmoqda.
Psixologlar bu holatni emotsional ehtiyoj bilan bog‘lashadi. Xitoydagi ruhiy salomatlik assotsiatsiyasi mutaxassisi Van Lyufen so‘zlariga ko‘ra, yumshoq o‘yinchoqlar insonda xavfsizlik va taskin hissini uyg‘otadi:
“Ular gapirmaydi, tanqid qilmaydi va har doim yoningizda bo‘ladi. Bu shartsiz ravishda qo‘llab-quvvatlashning bir shaklidir”.
Tahlilchilar fikricha, bu kabi xizmatlar mehmonxonalarga yangi auditoriyani jalb qilish, mijozlar bilan aloqani kuchaytirish va brendga ijobiy munosabat shakllantirishda samarali vosita bo‘lishi mumkin.
Izoh (0)