Devid va Viktoriya Bekhem mashhur sevgi qissalarini 25 yildan ortiq vaqt mobaynida ko‘pchilikni hayratga solayotgan g‘oyat mustahkam nikohga aylantirdi. Ular butun dunyo e’tiborida bo‘lsa-da, muhabbat va oila eng oliy qadriyat bo‘lib qolishini isbotladi.
Odatda mashhurlarning sevgi hikoyalari tez alangalanib, tez so‘nadi, ammo Devid va Viktoriya Bekhemlarning muhabbati bundan istisno. Chorak asrdan ko‘proq vaqt o‘tgan bo‘lsa-da, ularning turmushi hamon mustahkam. Ular qanday bo‘ronlarni boshdan kechirganini va birga qolishlariga nima yordam berayotgani haqida ma’lumot beramiz.
Yolg‘izlik va bir ko‘rishdagi muhabbat
1997-yilda Devid Bekhem “Manchestr Yunayted”ning yangi yulduzi bo‘lsa, Viktoriya Adams esa Spice Girls guruhida jahon musiqa reytinglarini zabt etayotgan xonanda edi.
Ular xayriya futbol o‘yinida uchrashib qolishadi, keyinchalik ikkisi ham e’tirof etganidek, bu birinchi qarashda yuz bergan muhabbat edi.
“Ikkalamiz ham mashhur edik, ammo o‘zimizni yolg‘iz his qilardik. Soatlab suhbatlasha olardik va bu ikkalamiz uchun ham juda muhim edi”, deydi Viktoriya intervyularining birida.
Devid muxlislari ko‘pligiga qaramay, ancha tortinchoq yigit edi. Ular ko‘pincha avtomobil to‘xtash joylarida, hamma joyda hoziru nozir bo‘lgan paparatssilardan qochish maqsadida yashirincha uchrashishardi. Devid hali-hanuz Viktoriya telefon raqamini yozib bergan poyezd chiptasini asrab-avaylab saqlaydi.
Kameralar nigohida nikoh, farzandlar va oila
Ikki yil o‘tgach, 1999-yil 4-iyulda Irlandiyaning Lattrelstoun qasrida ularning dabdabali to‘yi bo‘lib o‘tdi. Bu voqea darhol jahon nashrlarining muqovalarida aks etdi. Kelin-kuyov uchun oltin taxtlar, noyob liboslar va mashhurlardan iborat mehmonlar ro‘yxati — bularning barchasi “Bekhemlar brendi” fenomeniga asos soldi. Ko‘p o‘tmay ularning ilk farzandi Bruklin dunyoga keldi, undan keyin Romeo, Kruz va uzoq kutilgan qizlari Xarper Seven tug‘ildi.
Ularning har bir qadami, jamoat oldiga chiqishi, yangi loyihasi shov-shuvga sabab bo‘lardi. Ular dunyodagi eng ko‘p muhokama qilinadigan va suratga tushadigan juftliklardan biriga aylandi. Devid va Viktoriya boshidanoq oilani birinchi o‘ringa qo‘ydi. Hayot va karyeraning shiddatli sur’atiga qaramay, ular doimo bir-birlari va farzandlari uchun vaqt topa oldi. Ular shaxsiy hayotlari atrofida ko‘rinmas qalqon yarata oldi va o‘zlari uchun qadrli bo‘lgan narsalarni buzishlariga yo‘l qo‘yishmadi.
Inqirozlar, xiyonat va birga qolish tanlovi
Bekhemlar ham, ko‘p yillar birga yashagan har qanday juftlik singari jiddiy sinovlarga duch keldi. 2004-yildagi eng shov-shuvli mojaro Devidning shaxsiy yordamchisi Rebekka Lus bilan xiyonatda ayblangani edi.
Tahqirlanish va azob-uqubatlarga qaramay, Viktoriya oilasi uchun kurashishga qaror qildi. Ular oilaviy muammolarni tashqariga chiqarmasdan, yopiq eshiklar ortida hal qilishdi. Bu xiyonat ularning nikohini yanada mustahkamladi. Ular birga qolishni va munosabatlarini yaxshilashni tanlashdi.
Viktoriya soyada qolmadi
Ularning nikohi uzoq yillar davom etishining asosiy sabablaridan biri Viktoriyaning hech qachon “mashhur futbolchining xotini” roli bilan cheklanib qolmaganligidadir. U Spice Girls guruhidagi faoliyatini yakunlagach, erining soyasida qolib ketmadi, aksincha o‘z imperiyasini barpo etishga kirishdi. Dastlab bu hamkorliklar va kichik dizaynerlik tajribalaridan iborat bo‘lgan bo‘lsa, keyinchalik butun dunyo bo‘ylab tanqidchilar e’tirofiga va mijozlar mehriga sazovor bo‘lgan to‘laqonli Victoria Beckham moda brendiga aylandi.
“Men ishimni sevaman. Farzandlarim hamda turmush o‘rtog‘im men bilan faxrlanishlarini xohlayman”, degan edi u. Viktoriyaning muvaffaqiyati va mustaqilligi ularning munosabatlarida sog‘lom muvozanatni yuzaga keltirdi. U Devid uchun shunchaki rafiqa emas, balki fikri ahamiyatga ega, intilishlari hurmat qilinadigan teng huquqli hamkordir. Bir-birining karyera maqsadlariga bo‘lgan bu o‘zaro hurmat ularning nikohining asosiy ustunlaridan biriga aylandi.
Devidning qo‘llab-quvvatlashi
Devid Bekhem, o‘z navbatida, xotiniga bo‘lgan muhabbati va qo‘llab-quvvatlashini ommaga izhor etish imkoniyatini hech qachon qo‘ldan boy bermaydi. Ijtimoiy tarmoqlarda tug‘ilgan kuni yoki boshqa kun munosabati bilan ta’sirli xabarlar joylashtiradimi yoki suhbatlarda samimiy so‘zlar aytadimi — u doimo Viktoriyaning uning va oilasining hayotida qanchalik muhim rol o‘ynashini ta’kidlaydi. Turmush qurganlariga 25 yildan oshgan bo‘lsa-da, u haqda gapirganida ko‘zlari hamon mehr bilan porlaydi.
Yaqinda namoyish etilgan “Bekhem” hujjatli serialida tomoshabinlar yana bir bor ularning muhabbatini ko‘rdilar. Devid Viktoriyaning kuchi, oilaga sadoqati va iste’dodi haqida ochiqchasiga hurmat bilan gapirdi.
“U ajoyib ona, ajoyib rafiqa va g‘oyat tirishqoq ayol”, deydi u. Turmush o‘rtog‘i uning suyanchig‘i va maslahatchisi ekanligini tan olishdan tortinmaydi.
Viktoriya va Devid Bekhemlar qissasi ertak emas, balki yuksakliklar va qiyinchiliklar orasidagi yo‘l bo‘lib, unda hurmat, o‘zaro qo‘llab-quvvatlash va nafaqat g‘alaba onlarida, balki har qanday vaziyatda yonma-yon bo‘lishga tayyorlik asosiy o‘rin egallagan. Shon-shuhrat va millionlab muxlislar ortida bir-birining shaxsiyati va sa’y-harakatlarini qadrlaydigan haqiqiy juftlik turibdi. Ularning ittifoqi butun dunyo nigohida bo‘lsa-da, muhabbat mustahkam bo‘lishi mumkinligining isbotidir.
Izoh (0)