Amerikalik aktrisa Sidni Suini W Magazine jurnaliga bergan intervyusida bokschi Kristi Martin haqidagi bayopikda suratga tushish uchun 13 kiloga semirgani haqida so‘zlab berdi.
Aktrisaning so‘zlariga ko‘ra, u bir necha oy davomida rolga astoydil tayyorgarlik ko‘rgan. Bu vaqt ichida Sidni ovqatlanish ratsionini o‘zgartirdi va ko‘proq sport bilan shug‘ullana boshladi. Uning ertalabki jadvali ikki soatlik sport mashg‘ulotlari va kikboksing bilan shug‘ullanishdan iborat.
“Sidni rol o‘ynash uchun ko‘p mashq qildi. Qanchalik og‘ir bo‘lmasin, u har kuni ishga yugurib kelardi”, dedi film rejissyori va hammuallifi Devid Mishod intervyuda.
Hozircha nomlanmagan lenta 1990-yillarning eng mashhur amerikalik bokschisi Kristi Martinning hayoti haqida hikoya qiladi.
Kristining hayoti 1989-yilda menejer va bo‘lajak turmush o‘rtog‘i Jim Martin bilan uchrashganida shiddat bilan o‘zgara boshladi. U afsonaviy promouter Don King bilan shartnoma imzolagan birinchi bokschi, Boks shon-shuhrat zaliga kiritilgan birinchi ayol, shuningdek, Sports Illustrated muqovasida paydo bo‘lgan yagona bokschi bo‘ldi. Yuksak martaba va kuchli imijga qaramay, Martin zo‘ravonlikka duch keldi. 2010-yilda turmush o‘rtog‘i Jim uni o‘ldirishga uringan. Keyinchalik u 25 yilga qamaldi.
Aktrisa avvalroq Kristi Martin roli aynan uning uchun mosligini aytgandi: “Men 12 yoshimdan 19 yoshgacha greppling va kikboksing bilan shug‘ullanganman. Mashq qilish va tanamni o‘zgartirish uchun ringga qaytishni sabrsizlik bilan kutyapman. Kristining hikoyasi oddiy emas, u katta jismoniy va hissiy kuch talab qiladi, bu jiddiy yuk bo‘ladi. Lekin men o‘zimga qarshi chiqishni yaxshi ko‘raman”.
“Kristi Martin nafaqat ayollar boksini qonuniylashtirdi, balki gender stereotiplarini yengib o‘tdi, shuningdek, hissiy, jismoniy va moliyaviy zo‘ravonlikka qarshi kurashdi. Men ko‘plab qiyinchiliklarga duch kelgan va ularni o‘zini sindirishiga yo‘l qo‘ymagan ayolning hikoyasini baham ko‘rishim kerak”, deya qo‘shimcha qildi Suini.
Izoh (0)