“10 yil oldingi o‘zimga ko‘proq tug‘ishni maslahat berardim”. Dilnoza Ismiyaminova shaxsiy hayoti va xiyonat haqida

Xonanda Dilnoza Ismiyaminova “Milliy” telekanalining “Ayol qalbi” ko‘rsatuviga bergan intervyusida hayoti, ijodi va insoniy kechinmalari haqida gapirib berdi. 

San’atkorning hayotida og‘ir davrlar bo‘lgan. Ayniqsa, yaqinlarining xiyonati unga kuchli ta’sir qilgan.

Mening sog‘ligimga juda qattiq ta’sir qildi. Chunki hammasini ichimga yutaman. Do‘stlarimning xiyonati sabab odamlarni boricha qabul qilishni o‘rgandim. Ularning orasida jigarlarim ham bor edi, deydi xonanda.

Dilnoza kechira olish insondagi muhim fazilatlardan biri ekanini ta’kidlab, bu borada bolaligida eshitgan bir gap hayotida yo‘l ko‘rsatganini aytadi: “Oldin rahmatli buvim aytardilar, agar hammani yomon deyaversang, atrofingda hech kim qolmaydi deb. Chunki biz ham ideal emasmiz. Har kimning o‘z xarakteri bor. Shundan keyin kechirim so‘rashni va kechirishni o‘rgandim”.

U o‘z soddaligi sabab ko‘p aldanganini yashirmadi.

Hali ham odam ajrata olmayman. Juda soddaman va bundan foydalanganlar ko‘p bo‘lgan. Shunga qaramay, bu fazilatimdan voz kecha olmadim. Men hech qachon psixologga bormaganman. Chunki ularni eshita olmayman. Hayot menga psixolog. 14 yoshimdan buyon katta davradaman. Oqni ham, qorani ham ko‘rdim”, deydi u.

Ijodiy jarayonlarga to‘xtalar ekan, Dilnoza Ismiyaminova kollektivda ishlash oson emasligini tan oladi. Aytishicha, u mustaqil ishlashga o‘rgangan.

Kollektivda ijod qila olmaydigan insonman. O‘zimga xon, o‘zimga bekman. Lekin ijod uchun, tajriba uchun ba’zan moslashishga to‘g‘ri keladi, deydi Dilnoza. 

Ijodkor inson har doim e’tibor markazida bo‘ladi. Yaxshi ishlari — maqtov, xatolari esa tanqid bo‘ladi. Biroq ayrim tanqidlar yurakdan o‘tadi. Xonanda Dilnoza Ismiyaminova shu kabi og‘riqli holatlardan birini eslab o‘tdi:

Odamlar har doim nimadir degan men haqimda, bundan keyin ham deyishadi. Bir kuni Instagram’da juda yomon gap bo‘ldi. Keyin uning kimligini bilishga qiziqdim va u mening do‘stim bo‘lib chiqdi. Men har kuni u bilan birga choy ichganman. U mening ko‘zimga tik qaradi, ammo men qarolmadim. Do‘stimning xiyonatini kechiraman, deydi xonanda.

Ijodiy ilhom haqida gapirar ekan, Yulduz Usmonovani o‘zining motivatori deb ataydi.

Ko‘p ishlashim kerak deb aytaman. Yulduz Usmonovaga havas qilaman, u insonga tan beraman. U mening motivatorim, deydi u.

Bugungi yosh ijodkorlar haqidagi fikrlarini ham ochiq bildirib o‘tdi:

Hozirgi yoshlar biror qo‘shiqni sal o‘zgartirib yoki buzib aytsa ham “kover” deyishadi. Bu normal holat bo‘lib qoldi. Yoshlarning dunyoqarashi boshqacha. Yaxshi ijod qilayotganlar ham bor, masalan, Mashhurbekning qo‘shig‘i juda yaxshi chiqdi. U bunga loyiq edi, deydi san’atkor.

Shaxsiy hayoti haqida ham ochiq fikr bildirgan Dilnoza Ismiyaminova, 16 yoshdan oshgan o‘g‘li borligini aytdi.

Farzandim meni juda qadrlaydi. Doim: “O‘zingizga qarab, chiroyli bo‘lib yuring”, deydi. Bitta o‘g‘li bor onalar qizg‘anchiq qaynona bo‘ladi. Nasib bo‘lsa men unday qaynona bo‘lmayman. Farzandimni hayotiga aralashmayman, ular baxtli bo‘lsa, men xursand bo‘laman, deydi Dilnoza. 

10 yil oldingi Dilnozaga ko‘proq tug‘ishini aytgan bo‘lardim. Chunki bitta farzandim bor. Xudo xohlasa o‘g‘limni farzandlari ko‘p bo‘lsin, deydi u. 

San’atga bo‘lgan ishtiyoq unda juda erta uyg‘ongan. Dilnoza Ismiyaminova 7-sinfdan to‘yga chiqqanini va ichida doim olov yonib turganini aytadi. 

Dilnoza Ismiyaminova san’atga ilk qadam qo‘ygan davrdagi unutilmas bir voqeani shunday eslaydi:

Onam meni Turkiston saroyi qoshida tashkil etilgan to‘garakka olib bordi. U guruhga asosan boylarning bolasi qabul qilinar ekan. Men esa oddiy oila farzandi edim. O‘shanda qo‘shiq aytganimda, ustoz san’atkorlardan biri “ovoz paychalari kasal” degandi. Keyin yig‘lab qaytganman. Onamga hali shunaqa san’atkor bo‘laman, siz men bilan faxrlanasiz, deganman, deydi Ismiyaminova.

Xonanda yaqinda yangi qo‘shig‘i taqdim etilishini ma’lum qildi. Unga ko‘ra, ushbu tarona keng omma e’tiborini qozonib, hit darajasiga chiqishiga umid qilmoqda.

San’atkor muhabbat haqida quyidagicha fikr bildiradi: “Odam sevgisiz yashay oladi — mana men yashayapman. Ammo sevilib yashashni xohlayman, sevib emas”.

Xonanda Dilnoza Ismiyaminova taqdiridan to‘liq mamnun ekanini ta’kidladi. Aytishicha, hayotdagi har bir holat: sinov ham, ne’mat ham — Yaratganning inoyatidir. U ota-onasining farzandi ekanidan faxrlanadi va Alloh unga hech bo‘lmaganda bir farzand ato etgani uchun minnatdor.