San’at sohasidagi odamlarning munosabatlari ko‘pincha qisqa muddatli, shov-shuvli va beqaror bo‘ladi. Shunga qaramay, ayrim mashhurlar yillar davomida o‘zaro ishonch va hurmatga asoslangan mustahkam munosabatlar qurishga muvaffaq bo‘lgan. Quyida yillar sinovidan o‘tgan va barchaga o‘rnak bo‘ladigan 7 nafar taniqli juftliklar haqida hikoya qilinadi.
Bleyk Layvli va Rayan Reynolds: Ham hamkasb, ham sodiq juft
Aktrisa Bleyk Layvli va aktyor Rayan Reynolds 2010-yilda “Yashil fonar” filmini suratga olish vaqtida tanishgan. Ular 2012-yilning sentyabr oyida turmush qurgan va bugunga kelib ular to‘rt farzandning ota-onasidir.
Rayan Reynolds intervyularida ko‘p bora Layvlining o‘ziga bo‘lgan ishonchi tufayli “Dedpul” loyihasini oxirigacha olib chiqqanini aytgan. Bleyk esa turmush o‘rtog‘i bilan nafaqat oilada, balki biznesda ham hamkor. Ular Aviation American Gin va Mint Mobile kabi brendlarda birgalikda ishlaydi. Eng muhimi, ular bir-birining yutuqlarini doimo e’tirof etadi va mehnatini qadrlaydi.
Kit Xarington va Rouz Lesli: ekrandagi sevgi hayotga ko‘chganda
Britaniyalik aktyorlar Kit Xarington va Rouz Lesli 2012-yilda “Taxtlar o‘yini” seriali orqali tanilgandan so‘ng ularning ekrandagi muhabbati real hayotga ham o‘tgan. Juftlik 2018-yil Shotlandiyada nikohdan o‘tgan.
Ammo tez orada Kit alkogolga qaramlik muammosiga duch kelgan va 2019-yilda reabilitatsiya markaziga tushib qolgan. Rouz Lesli esa bu vaqtda turmush o‘rtog‘ini tashlab ketmagan va toki tuzalib ketguniga qadar yonida bo‘lgan. Kit Harington intervyularda ham bu haqda ko‘p aytadi va qayta tiklanishida rafiqasining o‘rni katta ekanini doim eslatib o‘tadi. Hozirda ular ikki farzandni voyaga yetkazmoqda.
Zendaya va Tom Holland: har qanday jabhada o‘zaro hurmat
Zendaya va Tom Holland 2016-yilda “O‘rgimchak odam: Uyga qaytish” filmini suratga olish vaqtida ilk bora birga ishlagan. O‘shanda ularning munosabatlariga faqat mish-mish deb qaralgan, so‘ng 2021-yilga kelib Tom va Zendaya buni tasdiqlagan.
Juftlik karyerasi davomida doim bir-birini qo‘llab-quvvatlaydi. Masalan, Zendaya rejissyorlik qilgan qisqa metrajli filmda Tom Holland texnik yordam ko‘rsatgan. Ular shaxsiy hayoti haqida juda kam so‘zlaydi, ammo har gal omma oldida ko‘ringanda, o‘zaro hurmat va samimiyat yaqqol ko‘rinib turadi.
Iyen Somerxolder va Niki Rid: qiziqishlar bir xil bo‘lganda
Iyen va Niki munosabatlari 2014-yilda boshlanib, ular 2015-yil aprelida turmush qurgan. So‘ng shaharlik kino yulduzlar sokin tabiat qo‘ynida yashashni istab, fermadagi uyga ko‘chib o‘tgan.
Hozirda ular ikki farzandni tarbiyalaydi, turli uy hayvonlarini parvarish qiladi, bog‘larga qaraydi va ekologik turmush tarzini targ‘ib qiladi. Iyen Brother's Bond Bourbon ichimligi orqali fermerlar va ekologik loyihalarni qo‘llab-quvvatlaydi, Niki esa ayollar sog‘ligi va hayvonlar himoyasi bo‘yicha faoldir.
Jeyson Steytem va Rouzi Xantington-Uaytli: muhabbat yillar o‘tib so‘nmasligi mumkin
Jeyson va Rouzi orasida 20 yosh farq bo‘lishiga qaramay, 2010-yildan buyon birga. Juftlik 2016-yilda unashtirilgan va ikki farzandni dunyoga keltirgan. Garchi ikkalasi ham ommabop aktyor va model sifatida tanilgan bo‘lsa-da, ular munosabatlari haqida ommaga jar solmaydi, faqatgina ba’zida ijtimoiy tarmoqlarda samimiy oilaviy suratlari bilan bo‘lishadi.
Beyonse va Jay-Z: muammolar ularni yanada yaqinlashtirgan
Beyonse va Jay-Z 2002-yildan buyon birga ishlagan, 2008-yilda esa nikohdan o‘tgan. Ammo 2014-yilda Jay-Z tomonidan xiyonat bo‘yicha mish-mishlar kuchaydi, bu esa xonandaning “Lemonade” albomida aks etdi. Shunga qaramay, juftlik birga qolishga qaror qildi. Ular og‘ir davrlardan so‘ng, 2023-yil oxirlarida yana sahnada birga chiqa boshladi. 2024-yilda Beyonsening “Cowboy Carter” turnesida Jay-Z Fransiyada unga hamrohlik qildi.
Metyu Makkonaxi va Kamila Alves: juftni o‘zgartirish emas, qabul qilish kerak
Amerikalik aktyor Metyu Makkonaxi va braziliyalik model Kamila Alves 2006-yilda tanishgan, 2012-yilda turmush qurishgan. Ularning uch farzandi bor. Juftlik turli muhitda tarbiya ko‘rgan va ulg‘aygan, qiziqishlari ham bir-biridan keskin farq qiladi, ammo barcha qarama-qarshiliklarga qaramay, bir-birini o‘zgartirishga harakat qilmagan.
Izoh (0)