“Daryo”da yangi loyiha — “Rakurs”. Uning ilk mehmoni reper Konsta bo‘ldi. Boshlovchilar u bilan turli mavzularda, xususan maqsad va kelajakdagi kasbni to‘g‘ri tanlash haqida suhbat qildi. Ijodkor qiyinchiliklardan tegishli xulosa chiqargani, u kunlarni quvonch bilan eslashi, muhojirlikdagi hayoti va hech qachon o‘z maqsadlaridan voz kechmagani haqida gapirdi.
Konsta eski muxlislarni unutdi?
— Men maʼlum yoshdagi insonlar emas, avvalo o‘zim uchun ijod qilaman. 2009-yillardagi ijodim o‘zimga yoqmaydi, shu bois u yillardagi ijodimdan faqatgina sanoqli treklarni ijro etaman. Inson o‘z ustida ishlagani sari avvalgi ijodidan qoniqmasligi tabiiy. Men nastalgiya xonandasi bo‘lishni istamayman. Hozir yashayapmanmi, demak zamon bilan hamnafas bo‘lishim kerak. Bundan tashqari, hali asosiy ijodimni yozayotgan insonman va bu treklarimni 60 yoshga kirganda ham aytish niyatim bor. Yashirmayman, ko‘nglim to‘lib ijod qilayotganimga 2-3-yil bo‘ldi. Menda ham o‘tish davri bo‘lgan va yozgan matnlarimning ko‘pidan ko‘nglim to‘lmaydi, deydi Konsta.
“Tanish-bilishim bo‘lmagani uchun aravakash bo‘lolmaganman”
— Baʼzan hayotda uchragan qiyinchiliklari haqida to‘lib-toshib gapirishadi. “Men bechora ofitsiantlik qilib qiynalganman”, desa hamma achinish bilan qaraydi. Ammo u paytlarda ofitsiant bo‘lish orzu edi. Birinchidan oq ko‘ylak kiyib ishga borasiz, ikkinchidan hamisha qorningiz to‘q bo‘ladi. Talabalik paytimda Eshonguzardagi mardikor bozoriga chiqib, ish beruvchilar kelsa, u tomonga qarab yugurardik. Ammo bu dahshatli, qo‘rqinchli hayot emas, unga juda oddiy qarayman. Zangiota tumanidagi mahallalardan biriga suv o‘tkazganimiz, chuqurlikka tushib, turbalarni ulagan kunlarimni quvonch bilan eslayman. Bundan tashqari, aravakashlik ham qilmoqchi bo‘lganman. Ammo bozordan arava olish tanish-bilishchilik bo‘lgani uchun bu ishni qilolmaganman.
U paytlarda kollejda o‘qirdim va bu biz uchun odatiy turmush tarzi edi. Bu gaplarni menga achinishlari uchun aytmayman, inson biror natijaga erishishi uchun shunday kunlarni ko‘rishi va shunda ham maqsadi sari intilishi kerakligi haqida aytish uchun ularni eslayman, deydi Konsta.
Suhbatni to‘liq holda tomosha qiling va o‘zingizni qiziqtirgan mavzular haqida izohlarda yozib qoldiring.
Izoh (0)