Fransiyada bo‘lib o‘tgan konsertda afsonaviy pop musiqa qiroli Maykl Jekson kiygan bir dona yaltiroq paypoq 8 ming dollardan ko‘proq pulga sotildi, deya xabar berdi TRT Global. Xonanda uni 1997-yildagi “Tarixiy jahon turne safari” davomida kiygan.
Jekson maxsus bezakli bu paypoqni “Billie Jean” nomli qo‘shig‘i ijro paytida kiygan. Janubiy Fransiyaning Nim shahrida bo‘lib o‘tgan konsertdan so‘ng texnik xodimlardan biri paypoqni xonanda garderobi yaqinida topib olgan va o‘zi bilan olib ketgan. Oradan o‘nlab yillar o‘tgach, paypoq dog‘larga to‘lgan, bezaklar va toshlar esa sarg‘ayib ketgan bo‘lsa-da, kimoshdi savdosida ashaddiy muxlislar tomonidan sotib olingan.
Avvalroq 2009-yilda Makao shahridagi kurortdagi qimorxonada Maykl Jeksonga tegishli yaltiroq qo‘lqop 350 ming dollarga sotilgan edi. Xonanda uni 1983-yilda ilk bor “Oy yurishi” raqsini ijro etgan paytda taqqan edi. Bundan tashqari, 2023-yilda Parijda Jeksonga tegishli shlyapa 80 ming dollardan ortiq narxga sotilgan.
Maykl Jekson (1958–2009) amerikalik qo‘shiqchi, raqqos, bastakor va prodyuser, zamonaviy pop musiqasining eng yirik namoyondalaridan biri. U 5 yoshidan ekranlarga chiqa boshlagan va The Jackson 5 guruhi tarkibida tanilgan. 1980-yillardan boshlab yakkaxon faoliyatida ulkan muvaffaqiyatlarga erishgan.
Uning Thriller albomi musiqa tarixidagi eng ko‘p sotilgan albom hisoblanadi. Billie Jean, Beat It, Bad, Smooth Criminal, Black or White kabi qo‘shiqlari musiqa sanoatida inqilob yasagan. Sahnadagi o‘ziga xos uslubi, xususan, “Oy yurishi” raqsi butun dunyoga mashhur bo‘lgan Jekson 13 marta “Gremmi” mukofoti sohibi bo‘lgan. Uni hanuz “Pop qiroli” deb atab kelishmoqda.
Izoh (0)