Asli sirdaryolik bo‘lgan, ota-onasidan erta ayrilib mehribonlik uyida ulg‘aygan sobiq raqqosa, aktrisa Zarina Yo‘ldosheva 2-iyunda 25 yoshni qarshiladi. Shu munosabat bilan aktrisaning hayoti va faoliyatiga nazar tashlaymiz.
“Ota-onamdan erta ayrilganman”
— Ota-onam bolaligimda vafot etishgan. Otam o‘lganida 8 yoshda edim. Onam dadam bilan birga uzoq vaqt kasalxonada bo‘lgan. Biz singlim bilan buvimning uyida bo‘lganmiz. Bir kuni o‘ynab yurganimda amakim kelib, dadamning vafot etgani haqida aytib qolgan, ammo u paytda vaziyatni to‘liq his qilmaganman. Keyin otamning mayiti buvimning uyidan olib ketilayotganida dadam bilan xayrlashib olishimni aytishgan. O‘shandagina dadamning qaytib kelmasligini his qilganman. “Dadam bilan ketaman”, deb rosa harhasha qilganman, ammalarim ushlab qolishgan.
Onam esa 12 yoshimda kasallik sabab vafot etdi. U SESda ishlardi, qo‘li yengil hamshira edi. Dadam kasal bo‘lganida ham asosiy muolajalarni o‘zi qilgan ekan. Onam xastalanib qolganida ukol qilishni o‘rgatib qo‘ygandi. 12 yosh bo‘lsam ham, osma ukollarini o‘zim qilardim. Hayotimdagi eng og‘ir kun onam o‘lganida sodir bo‘lgan. Shuning uchun hozir biror qiyin vaziyatga tushsam, u qadar tushkunlikka tushmayman. Chunki hayotimda undan bir necha bor qiyin kunlar sodir bo‘lgan, deya xotirlaydi Zarina Yo‘ldosheva.
“Meni asrab olmoqchi bo‘lishgan”
— Buvim keksayib qolgani va moddiy jihatdan qiyinchiliklarga duch kelgani uchun men, singlim va ukamni bolalar uyiga topshirishga majbur bo‘lgan. To‘rt yil davomida mehribonlik uyida tarbiyalandim. O‘shanda meni asrab olish uchun er-xotin kelishgan, ammo ular bilan ketishni istamaganman. “Mening ukam bilan singlim bor. Qarindosh-urug‘larim bizni olib ketishadi”, deganman. Shundan keyin ular kichik yoshdagi qizlardan birini asrab olishgan, deydi aktrisa Zarina Yo‘ldosheva
“Moddiy qiyinchiliklar sabab to‘ylarda raqqosalik qilganman”
— Negadir buvim onamni o‘qitishni istamagan ekan. Kollejlarga imtihon topshiriadigan kuni onamni xonasiga kiritib, ustidan qulflab qo‘ygan ekan. O‘shanda onam derazadan qochib bo‘lsa-da, imtihonga borgan ekan.
Men darsdan keyin raqs to‘garagiga qatnashardim. Raqs murabbiyim “Sen Xoreografiya oliy maktabida o‘qishing kerak, qobiliyating bor”, derdi. “Raqqosa bo‘laman”, deganimda buvim jiddiy qarshilik qilgan. O‘shanda tog‘am “Bu qiz onasiga tortgan, yo‘q desangiz, qochib bo‘lsa ham, imtihonlariga boradi”, degandi. Feʼl-atvorim onamga o‘xshaydi, qilaman degan ishimning uddasidan chiqaman. Maktabni tamomlaganimdan keyin qo‘limdan ushlab, Toshkentdagi Xoreografiya oliy maktabiga olib kelib, o‘qishga joylashtirishgan. Klassik raqs harakatlaridan bexabar bo‘lganim uchun ko‘p qiynalganman, dugonalarim tomonidan kamsitilgan paytlarim ham bo‘lgan. Toshkentga kelib yashashim oson kechmadi. Moddiy qiyinchiliklar sabab to‘ylarga chiqib pul ishlashga ham majbur bo‘lganman. Ammo bu ishimdan buvim qattiq ranjigan. Shu bois qayta to‘ylarga chiqmaganman, deydi sobiq raqqosa.
“Yulduz Usmonova sabab aktrisalikka qadam qo‘ydim”
— 2017-yili ansamblimiz bilan Yulduz Usmonovaning “Ey aziz inson” konsert dasturida ishtirok etganmiz. Yulduz opa sozandalar bilan mashq qilayotganida bir chetda maroq bilan qo‘shiqqa raqs tushganman. Shunda Yulduz opa yonlariga chaqirib, shu qo‘shiqqa yakka raqs tushsin, degan.
Bir necha oydan so‘ng, yarim kechasi Yulduz Usmonovaning maʼmuri qo‘ng‘iroq qilib, qaysidir aktrisa klip syomkasiga kelolmagani va o‘rniga men suratga tushishimni aytdi. Rosti, bu taklifga ko‘nishim oson bo‘lmadi. Suratga olish ishlari bor-yo‘g‘i 30-40 daqiqa davom etdi. Syomkadan so‘ng klipdagi epizodim uchun 50 AQSh dollari berishdi. Bu 17 yoshimgacha topgan eng ko‘p pulim edi. Mana shu voqeadan so‘ng kliplardan taklif tushsa, rad etmaydigan bo‘ldim, deydi aktrisa.
“O‘zimni bechora ko‘rsatib, atrofdagilarning rahmini keltirgim kelmaydi”
— Men o‘zimni bechora ko‘rsatib, odamlardan nimadir tilab yashashni istamayman. Hatto sanʼatga kirganimdan keyin ham ancha muddat atrofdagilarga shaxsiy hayotim haqida aytmaganman. Mehribonlik uyi rahbarini “Odamiylik mulki” ko‘rsatuviga taklif etishganida, menga qo‘ng‘iroq qilib: “Sen ham borib intervyu ber”, dedi. Rosti, shu darajaga yetishimga hissa qo‘shgan insonga rad javobini berolmadim. Ko‘rsatuv efirga ketgach, atrofimdagi insonlar shaxsiy hayotimdan xabar topishdi, deydi Zarina.
“Kimgadir pul berib, rol ijro etmayapman”
— Shu kungacha hech bir rejissyorga rol so‘rab murojaat qilmaganman. Taklif etishsa, imkon darajasida ijro etaman. Ammo o‘zimni qobiliyatli aktrisa deb bilmayman. Yoshi katta aktrisalar bilmaganlarimni o‘rgatishadi, institutda o‘qishimni tavsiya qilishadi. Baʼzi yosh aktrisalar esa ortimdan negativ gaplar tarqatib, g‘ashimni keltirishadi. “O‘zini bechora ko‘rsatib, piar qilyapti yoki pul berib rollar ijro etyapti”, degan gaplar ham qulog‘imga chalindi. Menimcha, hech bir inson ota-onasi vafot etganligi haqida gapirib obro‘ olishni istamaydi. Men sanʼatga pul berish emas, pul ishlash uchun qadam qo‘yganimni ham ko‘pchilik bilishadi, deydi Zarina Yo‘ldosheva.
“23 yoshimda singlimni turmushga berdim”
— Avvaldan singlimni turmushga berib, keyin o‘zim turmushga chiqaman deganman. 23 yoshimda singlimga ota-ona bo‘lib turmushga berdim. Menimcha, endi kun kelib o‘zim farzandlarimga to‘y qiladigan bo‘lsam, qiynalmasam kerak. Qarindoshlar ham kulib “quda xola” deyishadi. Chunki qizni qanday uzatish borasida tajribam bor. Endi o‘zim turmushga chiqib, keyin ukamni uylantirish niyatim bor. Hozir ukam institutda o‘qiyapti. Ammo turmushga chiqishdan avval Toshkentdan uy olishni va uni ukamga qoldirishni niyat qilganman, — deydi aktrisa Zarina Yo‘ldosheva.
Zarinaga begona yigit tahdid qildi
Zarina Yo‘ldosheva shu yilning mart oyida noxush holatga uchradi. Uni o‘z uyi oldida begona yigit ta’qib qildi. Yigitning nojo‘ya xatti-harakatlari ustidan ichki ishlar organlariga qo‘ng‘iroq qilgan aktrisa kuzatuvchilariga bu holat haqida gapirib berarkan, uchastka noziri ikki soat deganda kelganini aytadi. Bu paytda esa ta’qibchi ketib bo‘lgandi.
Keyinroq aktrisa sahifasiga yana bir video joylab, notanish yigit uchastka noziri tomonidan topilgani hamda undan kechirim so‘ragani haqida so‘zlab berdi.
“Shahzod Sultonov haqida gapirishni istamayman”
Zarina Yo‘ldosheva o‘zbek shou-biznesidagi kelinlikka nomzodlardan biri. Uning Shahzod Sultonov munosabatlari ko‘p marta muhokamalarga sabab bo‘lgan. Ammo Zarina hozir aktyor haqida gapirishni istamasligini aytadi.
— U haqida gapirishni istamayman. Iltimos, menga u aktyor haqida hech qanday savollarni bermanglar. Nimadir bilmoqchi bo‘lsangiz, uning o‘zidan so‘rang, deydi intervyularida aktrisa.
Aktrisa bugungi kunda eng talabgir aktrisalardan biri sifatida mashhur xonandalarning klipida suratga tushadi. Bundan tashqari teleko‘rsatuvlarda ham boshlovchilik qiladi.
Izoh (0)