San’at olamida yulduz bo‘lib, ko‘pchilikning e’tiborini qozongan san’atkor va ijodkorlarning ba’zilari mashhurlik cho‘qqisida o‘z faoliyatini to‘xtatib, hayotning boshqa yo‘llarini tanlagan. Ularning har biri o‘z sabablariga ko‘ra san’atdan voz kechgan. Maqolada shunday yulduzlardan bir nechtasini eslaymiz.
Aktrisa va xonanda sifatida tanilgan Indira Bilolova mashhurlik cho‘qqisida sanʼatdan ketgandi. 2017-yili italiyalik erkak unga uylanish uchun islomni qabul qilgan.
Indira “Romeo va Julyetta”, “Telba” va “Feride” kabi filmlarda suratga tushgan. Uning “Sevgi”, “Sevadi”, “Dunyo”, “Aytolmayman” hamda Abduvali Rajabov bilan kuylagan “Muhabbat qissasi” dueti hit bo‘lgan.
“Vaqf” xayriya jamoat fondi direktori Sardor Rahimxon ham sobiq xonanda. Uning asl ismi Sanjar Rahimov. U mashhurlik cho‘qqisida san’atni tark etib, hayotida yangi burilish yasadi.
Xonanda ko‘pgina davlat tadbirlariga qatnashib, konsertlar bergan. “O‘zbekkonsert” tomonidan uyushtirilgan bir tadbirga qatnashmagani sababli litsenziyasidan mahrum etilgan. Keyinchalik u shou-biznesni tark etganini eʼlon qilgan.
San’atkorning “Ishonmasman”, “Malikam, endi qara”, “Sanamjon”, “Narxi qancha mehrni ayting”, “Faridam” kabi qo‘shiqlari hit bo‘lgan.
2019-yildan xayriya-insonparvarlik ishlariga boshchilik qilib kelmoqda. Uning boshchiligida “Yurak amri” insonparvarlik loyihasi tashkil etilgan.
“Via Marokand” guruhidagi Asal ham sanʼat bilan xayrlashganlardan. U ijodini to‘xtatib, hattoki 1 million 400 ming obunachisi bor Instagram sahifasini ham duetdoshiga qoldirib ketgan. Ma’lumotlarga ko‘ra, Asal oila qurish arafasida shu qarorga kelgan ekan.
Guruhning “Sevib qoldim”, “Hamma harakatda”, “Tanimadingmi?” kabi qo‘shiqlari hit bo‘lgan.
Aktyor Akbarxo‘ja Rasulov ham san’atni tark etgan. Uning kinofilmdagi ilk roli “Xo‘ja Nasriddin: o‘yin boshlandi” filmi bo‘lib, unda epizodlarda ko‘rinish bergan. Keyinchalik “Yo‘qolgan odam”, “Iblis devori”, “Poyma-poy”, “Kechikkan hayot”, “Sevginator 2” “Mendirman Jaloliddin” kabi filmlarda rol ijro qilgan.
O‘zbek milliy akademik drama teatri aktrisasi Zilola G‘ulomova ham mashhurlikdan voz kechib oddiy hayotni tanlagan.
Zilola G‘ulomova 2019-yilda “Jangovar qaynona” teleserialida va 2021-yilda “Ayol qasosi” filmida bosh rollarda suratga tushdi. Shuningdek, “Jumboq” (2021), “Telba oshiqlar” (2019), “Soddagina qiz” (2013) kabi filmlarda ham rollar ijro etgan.
“Million” kulgi jamoasining sobiq a’zosi Mirkomil Musayev bir vaqtlar o‘zining sahnadagi hazil-mutoyibalari bilan tomoshabinlarning qalbini zabt etgan edi. Ammo u keyinchalik san’atdan chetga chiqib, sahnaga chiqishni to‘xtatdi. Ayni paytda u shaxsiy hayotiga ko‘proq e’tibor qaratmoqda.
Alisher Botirov ham “Million” kulgi jamoasining mashhur a’zolaridan biri bo‘lgan. Uning aktyorlik mahorati ko‘plab muxlislar tomonidan e’tirof etilgan. Ammo u ham sahnani tark etgan. Uning san’atdan ketishi sabablari aniq aytilmagan bo‘lsa-da, hozirda omma orasida kamnamo bo‘lib qolgan.
Madina Mumtoz
Xonanda va aktrisa Madina Mumtoz ham san’atni butunlay tark etgan. U turmush o‘rtog‘ining talabi bilan faqat ayollar ishtirok etadigan to‘ylarda qo‘shiq kuylardi. Ammo bir yildan buyon bunday to‘ylarda ham ishtirok etmayapti.
Madina Mumtozning oshpazlik kurslari onlayn tarzda o‘tsa-da, unga talab nihoyatda yuqori. Shu bilan birga, uning “Osiyo sulton” nomli kelin ko‘ylaklari saloni ham bor.
Sevara
Xonanda Sevara o‘zbek shou-biznesida yonib chiqqan xonandalardan biri edi. Afsuski, uning ijodi uzoqqa cho‘zilmadi. U oila qurib, farzandli bo‘lgach, san’atni tark etdi.
U ayni kunlarda Safina ismli qizalog‘ining parvarishi va “Maryam” nomli internet do‘konining faoliyati bilan band.
Doston Ubaydullayev
Xonanda Sardor Rahimxonning xayrli loyihalariga bosh qo‘shgan hamkasbi Doston Ubaydullayev ham ko‘p o‘tmay san’atni butunlay tark etdi. Xonanda bilan bog‘lanib, nimalar bilan bandligiga qiziqdik. Ammo u hech qanday tijorat ishi bilan shug‘ullanmayotgani va ilm o‘rganayotganini ma’lum qildi.
Iroda Iraliyeva
Ulug‘bek Rahmatullayev bilan kuylangan “Mini yubka-2” qo‘shig‘i bilan xalqqa tanilgan xonanda Iroda Iraliyeva ham san’atni butunlay tark etgan. Ayni damda u uch farzandning onasi va go‘zal oilaning bekasi hisoblanadi. Sobiq xonanda intervyularining birida uzoq yil befarzand bo‘lgani va Haq yo‘lini tanlagach, Alloh unga o‘g‘il farzand in’om etgani haqida so‘zlab bergandi. U bor e’tiborini ilm o‘rganish va farzandlarining tarbiyasi bilan shug‘ullanishga sarflayotganini bildirib o‘tgan.
Bonu
“Qora tun” va “Afsona” qo‘shiqlari bilan tanilgan xonanda Bonu ham allaqachon san’atni tark etgan. Ayni mashhurlik cho‘qqisiga erishganda sud ishi va jiddiy xastaligi bois uning hayoti butunlay o‘zgarib ketgan.
U sog‘aygach, mashina va ko‘chalarga kichik reklama e’lonlarini tarqatish bilan shug‘ullanadigan firmaga ishga kirgan. Hozirda shu firmaning kichik hisobchisi bo‘lib faoliyat yuritadi.
Diyorbek Mahkamov
Bolalik chog‘idan katta sahnaga chiqib Shuhrat Qayumov, Manzura kabi mashhur ijodkorlar bilan duet kuylashga muvaffaq bo‘lgan. Afsuski, u ijodini 2016-yilda yakunlagan.
Sherzod Bin
Sherzod Bin taxallusi bilan ijod qilgan komik aktyor Sherzod Saidaliyev ham san’atni butunlay tark etgan. U ayni kunlarda onasi va turmush o‘rtog‘i bilan birga AQSHda istiqomat qiladi.
Kamola Arslonova
“Opa-singillar” serialida Diyora rolini ijro etgan Kamola Arslonova ham san’atni butunlay tark etgan. U sakkiz yildan buyon Turkiyaning Izmir shahrida yashaydi. U Mesut ismli kichik tadbirkorga turmushga chiqqan. Ularning Axsen ismli qizi bor.
Kamola Arslonova qo‘l mehnati bilan shug‘ullanadi, shu bilan birga, onlayn dars o‘tib hunarini boshqalarga ham o‘rgatadi.
Izoh (0)