O‘zbek tomoshabinlariga “Malikam, endi qara” serialidagi obrazi orqali yaxshi tanish bo‘lgan Hande Erchel to‘rt yil ichida birinchi marta AB Talks podkasti uchun katta va juda ochiq intervyu berdi. O‘zi va rejalari haqida gapirishni, shuningdek, shaxsiy hayoti bilan o‘rtoqlashishni unchalik yoqtirmaydigan aktrisaning muxlislari uchun bu quvonchli yangilik bo‘ldi.
Yulduzning ushbu intervyusi ko‘pchilikka ular oldida shunchaki chiroyli va jozibador model emas, balki haqiqiy muvaffaqiyatga erishish yo‘lida ko‘plab mashaqqatlarni boshdan kechirgan kuchli shaxs turganini ko‘rishga yordam berdi.
Onasining vafotiga hali ham ko‘nika olmayotgan aktrisa
Onasi Aylinning onkologiyadan vafot etishi Hande Erchel uchun dahshatli zarba bo‘ldi. Aktrisa, garchi har doim shunday to‘g‘ri tamoyilga amal qilib yashagan bo‘lsa-da, hozir va shu yerda o‘zingizda bor narsani qadrlash qanchalik muhimligi haqida ko‘p gapirdi.
Aktrisa ushbu og‘ir judolikka ko‘nikish juda qiyin ekanini ta’kidlagan. Biroq insonda unutish qobiliyati bor, bu xususiyat og‘riqni yengishga yordam beradi. Ammo bu ham Handega onasini yo‘qotishdek musibatning oqibatlaridan butunlay qutulishga yordam bermaydi. Aktrisa ba’zida judolikning ilk kunidagidek ko‘z yoshlarga g‘arq bo‘lishini ham yashirmagan.
Ona bo‘lishni orzu qiladi
Ko‘pchilik tomoshabinlar Hande Erchelni farzand ko‘rishni istamaydi, deb o‘ylaydi. Aktrisa intervyuda muxlislarining ushbu taxminlari asossiz ekanini ta’kidladi. Aktrisa ona bo‘lish eng katta orzularidan biri ekanini aytadi.
Hande agar qiz farzandli bo‘lsa, unga marhum onasining ismini qo‘yishni rejalashtirmayapti. Sababi uning yaqinda saratonni yenggan jiyani Mavi shunday ismga ega. Ma’lum bo‘lishicha, Handening opasi Gamze qiziga onasining ismini qo‘ygan.
Xeyterlarini aslo kechirmaydi
Intervyu davomida aktrisa yana bir og‘riqli mavzu — tashqi ko‘rinishi va aktrisalik mahoratini tanqid qilishlari haqida gapirdi. Hande onasining ahvoli og‘irlashgan paytda va uning o‘limidan so‘ng ijtimoiy tarmoqlarda turli xil mish-mishlar qurboniga aylandi. Barcha sinovlar bir paytda, ketma-ket kelgani uchun aktrisaga ularni yengish oson kechmagan.
Hande hayotining o‘sha og‘ir davrida salbiy izohlar yozib, uni mazax qilishga uringan odamlarni hech qachon kechirishga o‘zida kuch topa olmasligini aytdi.
Shunga qaramay, Hande Erchel o‘sha vaziyatlardan minnatdor ekanini tan oldi, chunki aynan ular aktrisaning xarakterini chiniqtirdi va ancha xotirjam bo‘lishiga yordam berdi. Tanqidlar uni yaxshi tomonga o‘zgartirdi, ammo Hande orqaga qarab, bunga munosib bo‘lmaganini ta’kidlaydi.
Onasining o‘limidan so‘ng depressiyaga tushib qolganini yashirmadi
Aktrisa onasini yo‘qotganidan keyin tushkunlikka tushib qolgani haqida to‘g‘ridan-to‘g‘ri gapirmadi. Lekin o‘shanda u barcha tashvishlari va og‘riqlari jamlangan o‘z qobig‘iga o‘ralib qolganini aytdi. Handening ta’kidlashicha, u o‘z hayoti borligini eslagan va u uchun kurashgan. Ammo bu “jang” unga oson bo‘lmadi: turk seriallari yulduzi hammasini tashlab ketishga ham tayyor bo‘lganini aytdi.
O‘limdan qo‘rqmaydi
Onasini vafoti aktrisada yana kimnidir yo‘qotish qo‘rquvining paydo bo‘lishiga turtki bo‘ldi. Unga jiyani Mavi bilan bog‘liq vaziyat haqiqiy zarba bo‘ldi, ammo xayriyatki, bu yaxshilik bilan yakunlandi.
Shu bilan birga, Hande o‘limdan qo‘rqmaydi va agar kimdir unga o‘limining aniq sanasi ko‘rsatilgan xatni berganida, u uni darhol ochishi aniq edi. Buning sababi shundaki, “Qalbim eshigimni qoqL filmidagi aktrisa to‘laqonli hayot kechirishga intiladi va kelajak qanday bo‘lishidan qo‘rqmaydi.
Onasi haqidagi eng yorqin xotirasi qo‘shiqchi Sezen Aksu bilan bog‘liq
Ma’lum bo‘lishicha, aktrisaning onasi xonanda Sezen Aksu ijodining ashaddiy muxlisi bo‘lgan. Handedan volidasi haqidagi so‘nggi xotiralari haqida so‘ralganida, u kasalxonada onasiga Sezenning qo‘shiqlaridan birini qo‘yib berganini, keyin ular jim o‘tirib, taronani tinglashganini aytdi. Ushbu lahza Hande Erchelning xotirasida butun umrga muhrlangan.
“Insonni tashqi ko‘rinishiga qarab baholab bo‘lmaydi”
Turk seriallari yulduzi tashqi go‘zallik toza qalb bilan to‘ldirilmasa, hech qanday ma’noga ega emasligini alohida ta’kidladi. Hande Erchelning fikricha, yovuz odam hech qachon jozibali bo‘lib ko‘rinmaydi, hatto uning tashqi ko‘rinishi idealga yaqin bo‘lsa ham.
“Qanchalik go‘zal bo‘lishni istasang-da, qalbingda yomonlik bo‘lsa, bu go‘zallik ko‘rinmaydi. Sen chiroylisan, lekin bu muvaffaqiyat keltirmaydi”, deydi aktrisa.
Qizning tan olishicha, boshqalarni faqat tashqi ko‘rinishiga qarab baholaydigan odamlar uni charchatadi, shuning uchun u hech qachon kitobni muqovasiga qarab tanlamaydi, balki uzoqroq va chuqurroq qarashga harakat qiladi.
Izoh (0)