“Oskar”ning yosh iste’dodlari: kinomukofotga nomzodi qo‘yilgan bolalar

8 yoshdan 14 yoshgacha bo‘lgan bu bolalar allaqachon dunyoning eng nufuzli kino mukofotiga nomzod etib ko‘rsatilgan.

Jodi Foster — 14 yosh

Jodi Foster karyerasini bolalikdan boshlab, 14 yoshidayoq hammaning e’tiboriga tushdi. 1976-yilda Martin Skorsezening mashhur “Taksichi” filmidagi Iris roli uchun “Oskar” mukofotiga nomzod bo‘ldi. Yoshiga qaramay, uning qahramoni hayratlanarli darajada murakkab edi: sodda, ammo allaqachon hayotdan ko‘ngli qolgan jinoiy hayot qurboni edi. Foster g‘olib bo‘lmasa-da, shubhasiz, hammaning xotirasida chuqur iz qoldirdi.

Atigi 12 yildan so‘ng, u “Ayblanganlar” filmidagi obrazi uchun birinchi haykalchasini qo‘lga kiritdi, uch yil o‘tib esa “Qo‘zilar sukuti” filmidagi Klarisa Starlingning unutilmas ijrosi uchun ikkinchisini oldi. Bu g‘alabalar uni 30 yoshgacha ikkita “Oskar”ga sazovor bo‘lgan birinchi aktrisa maqomiga ko‘tardi. O‘tgan yili, birinchi nomzodlikdan deyarli 50 yil o‘tgach, Foster yana “Diana Nayed” filmi uchun mukofotga nomzod etib ko‘rsatildi.

Sirsha Ronan — 13 yosh

Irlandiyalik aktrisa Sirsha Ronan 13 yoshida “Tavba” dramasida Brioni Tallis rolini ijro etib, birinchi marta shuhrat qozondi. Uning qahramoni aktrisaga “Eng yaxshi ikkinchi darajali ayol roli” nominatsiyasini keltirdi.

Ronan 1950-yillar Nyu Yorkidagi vatanini sog‘ingan irlandiyalik muhojir rolini “Bruklin” melodramasida, isyonkor o‘rta maktab bitiruvchisi rolini Greta Gervigning “Xonqizi” dramasida va Jo March rolini Gervigning “Kichkina ayollar” dramasida ijro etgani uchun ham katta e’tirofga sazovor bo‘ldi. Hayratlanarlisi shundaki, 25 yoshida Sirsha faqat Jennifer Lourensdan keyin shuncha nominatsiyaga ega bo‘lgan eng yosh aktrisa sifatida tarixga kirdi.

Heyli Joel Osment — 11 yosh

“Men o‘liklarni ko‘ryapman” iborasi 11 yoshida “Oltinchi sezgi” trillerida Koul Siyerni gavdalantirgani uchun “Oskar” mukofotiga nomzod bo‘lgan Heyli Joel Osment tufayli mashhur bo‘lib ketdi. Uning qahramoni — arvohlar bilan muloqot qila oladigan bola — ham oddiy tomoshabinlarni, ham mutaxassislarni hayratga soldi. Haykalcha Maykl Keynga nasib etgan bo‘lsa-da, Osment darhol eng istiqbolli bolalar aktyorlari safiga qo‘shildi.

Aslini olganda, “Oltinchi sezgi” filmini suratga olish paytida u allaqachon tajribaga ega edi. 5 yoshida u “Forrest Gamp” filmida kichik Forrest rolida debyut qilgan, so‘ngra sitkomlarda rol o‘ynagan. M.Nayt Shyamalanning muvaffaqiyatidan keyin, u Stiven Spilbergning “Sun’iy aql” filmida bosh rolni ijro etdi va Kevin Speysi bilan birga “Boshqaga to‘la” ijtimoiy dramasida suratga tushdi.

Ebigayl Breslin — 10 yosh

2006-yilda 10 yoshli Ebigayl Breslin “Kichkina baxt” filmidagi ta’sirchan Oliviya Guver obrazi bilan tomoshabinlarni o‘ziga maftun etdi. Uning qahramoni — g‘alati oilasi bilan birga eski furgonda go‘zallik tanloviga borayotgan orzu-havasli qizcha. Bu tragikomediya to‘rtta “Oskar” nominatsiyasiga sazovor bo‘ldi, ulardan biri Breslin uchun edi.

“Kichkina baxt” filmida suratga tushish paytida aktrisa allaqachon katta tajribaga ega edi. U 3 yoshida reklama roliklarida suratga tusha boshlagan, 6 yoshida esa M. Nayt Shyamalanning “Belgilar” filmida kino olamiga kirib kelgan. Biroq aynan Oliviyaning Super Freak qo‘shig‘i ostidagi mashhur raqsi uni haqiqiy yulduzga aylantirdi.

Breslin mahoratli Jenifer Hadsonga yutqazgan bo‘lsa-da, uning karyerasi shu bilan to‘xtab qolmadi. 2009-yilda u “Zombilendga xush kelibsiz” filmida Litl-Rok rolini ijro etdi.

Jastin Genri — 8 yosh

Jastin Genri hamon tarixdagi eng yosh “Oskar” nomzodi bo‘lib qolmoqda. U 8 yoshida “Kramer Kramerga qarshi” dramasida Billi Kramer rolini ijro etib, uning qahramoni ota-onasi (Dastin Hoffman va Meril Strip) o‘rtasidagi vasiylik uchun haqiqiy kurashning markaziga aylandi. Film beshta “Oskar” mukofotini qo‘lga kiritdi, Genri esa nomzodlikka sazovor bo‘lib, ko‘p yillar davomida rekordchi bo‘lib qoldi. 

O‘sha safar 78 yoshli aktyor Melvin Duglas g‘olib bo‘lgandi. Ajablanarlisi shundaki, g‘ayrioddiy bo‘lsa-da, baribir rekord sohibining kinodagi karyerasi keyinchalik rivoj topmadi. Film va seriallarda bir nechta ikkinchi darajali rollar ijro etgan bo‘lsa-da, Robert Bentonning klassik asariga teng keladigan biror ish bo‘lmadi. Genri hatto aktyorlikda ham o‘qimagan. U Skidmor kollejining psixologiya fakultetini tugatib, media biznesida karyera qurdi. 2009-yildan beri u internet-televideniye sohasida faoliyat yuritadigan Veoh kompaniyasida rahbarlik lavozimini egallab kelmoqda.