Mashhur san’atkorlar ishtirokidagi ayrim konsertlarda favqulodda vaziyatlar yuz bergan va hatto ba’zilarining hayoti xavf ostida qolgan. Quyida mashhurlar sahnada duch kelgan kutilmagan hodisalarni yodga olamiz.
Beyonse
Cowboy Carter gastrol safari doirasida Beyonse kabrioletda tomoshabinlar ustidan uchib o‘tayotgan edi, ammo to‘satdan mashina qulay boshladi. Qo‘shiqchining jamoasi uni yerga tushirish bilan ovora bo‘lib turgan bir paytda, Beyonse qo‘shiq aytishda davom etdi. Keyingi konsertlarda esa kabrioletni katta sun’iy otga almashtirishdi.
Keti Perri
Avstraliyadagi Lifetimes Tour konsertlaridan biri Keti Perri va uning muxlislari uchun fojia bilan yakunlanishi mumkin edi. Xonanda zal bo‘ylab uchadigan sharning ichidan tushib ketishiga bir baxya qoldi. Yaxshiyamki, bu hodisa yerga qo‘nishga biroz qolganda sodir bo‘ldi va Keti tezda sahnaga qaytishga muvaffaq bo‘ldi.
Oliviya Rodrigo
Xavf faqat sahna ustida emas, ostida ham bo‘lishi mumkin. Buni Oliviya Rodrigo o‘z konsertida boshidan kechirdi. Avstraliyaning Melburn shahridagi shou paytida u muxlislarni qutlayotgan mahal texnik chuqurlikka tushib ketdi. So‘ng u “Hechqisi yo‘q, men yaxshiman”, deya darhol muxlislarini tinchlantirdi va konsert dasturini davom ettirdi.
The Weeknd
Bir necha yil avval The Weeknd Mexikoda Party Monster qo‘shig‘i ijro etayotgan vaqtda sahnadagi dekoratsiya xonandadan atigi bir necha santimetr uzoqlikda qulab tushdi. Xonanda hatto buni darhol payqamadi, ammo konsertdan so‘ng ushbu voqea videosini ijtimoiy tarmoqlarda baham ko‘rdi.
Aka-uka Jonaslar
2024-yilda Pragada o‘tkazilgan konsertda aka-uka Jonaslarni muxlislardan biri jiddiy qo‘rqitdi. U sahnaga lazer olib kirdi va uni san’atkorlarga tutib turdi. Nik Jonas bu holatni ko‘rib, darhol xavfsiradi va sahnani tark etdi. So‘ng xonanda xavfsizlik xodimlariga xabar berdi. Bunday “hazillar” albatta oqibatsiz qolmaydi.
Billi Aylish
Xonandaning Nyu Yorkdagi Hit Me Hard and Soft konsert dasturi yakunlanayotgan edi. Ammo Billi Aylish sahnani chiroyli tarzda tark eta olmadi — oxirgi zinapoyada toyib ketdi. Oradan biroz vaqt o‘tib Billi muxlislariga ulkan ko‘kargan joyini ko‘rsatdi. Ammo bunday yiqilish boshqacha yakun topishi mumkin edi.
Izoh (0)