So‘z ustasi Avaz Oxun Milliy telekanalining “Ayol qalbi” ko‘rsatuviga intervyu berdi. U suhbat davomida erkaklar ham yig‘lashi, konsertidagi ta’sirli gaplari sabab oilalar ajrim yoqasidan qaytgani, Instagram sabab oilalar ajrashayotgani va ayolini qanday tushunishi haqida gapirdi.
“Erkak ham yig‘laydi”
— Erkak kishi ham yig‘laydi, u ham odam. Ayollar oshkora yig‘laydi, lekin bu erkakka yarashmaydi. Biz yashirib, ko‘rsatmay yig‘laymiz. Oxirgi marta nega yig‘laganim esimda yo‘q, uka-singillarim, jigarlarimning to‘yini ko‘rsam ham yig‘lab yuboraman. “Xudoyim, qanday kunlarni ko‘rmagan edik, bugun shu kunlarga yetkazding” deya, va albatta, ko‘ngil bo‘shligidan bu ham. Juda oshkora yig‘lamasangiz ham o‘pkangiz to‘ladi. Bu baxt ko‘z yoshlari bo‘ladi. Lekin shukr-ki, azobdan, alamdan yig‘lamadik.
Alloh qaysi bandasiga ko‘p bersa, shundan ko‘proq so‘rab ham oladi. Ota-ona deymiz-u, lekin baribir nomardligimiz bor. Ota-onamiz yashayotgan uydan o‘zimizning uyimiz hashamatliroq, ular minayotgan mashinadan o‘zimizniki yaxshiroq, deydi so‘z ustasi.
Ayol sevib qolsa qanday bo‘ladi?
— Yuqorida aytganimni teskarisi-da, ayol oshkora, erkak pinhona yig‘laydi dedim-ku. Ayol kishi pinhona sevadi, erkak kishi oshkora sevadi. Farqi mana shunda. Biz erkaklar bor gapimizni aytib qo‘yamizu, lekin ayollar ich-etini yeb, kuyib, adoyi tamom bo‘lsa ham bildirmay ushlab turadi. Qattiq sevsa ham bildirmaydi.
Ayolni sevish kerakmi yoki tushunish? Uni sevish kerak. Sevsangiz qolgan hammani shuning soyasida ketaveradi, deydi Avaz Oxun.
Avaz Oxunning rafiqasi xafa bo‘lsa va men yaxshiman desa, qiziqchi buni qanday tushunadi?
— Er-xotin birga yashagani sari bir-birini tushunib qoladi. Har bir gapi, nima xohlayotgani, arazi qay vaqtgacha davom etishigacha bilasiz. Ayol kishiga sen haqligingni hech qachon isbotlab berolmaysan. U doim haq. Haq bo‘lsa ham, nohaq bo‘lsa ham, haq. Erkak buni tushunishi va tan olishi kerak, tamom. Birinchi bo‘lib uzr so‘rash erkakning vazifasi, deb o‘ylayman. Uyda ham, xato qilsangiz, albatta, kechirim so‘raysiz.
Ayolning mehri inson tug‘ilganidan to vafot etgunga qadar davom etadi. Orada hech qachon uzilish bo‘lmaydi. Erkak ayolning mehrisiz yasholmaydi. Tuyg‘ularsiz yashashni men yashash deb hisoblamayman, deydi so‘z ustasi.
“Konsertim sabab ajrim yoqasida turganlar yarashgan”
— Konsertimda ajralishlar haqida gapirganimda ko‘zimga yosh kelgan, shunda bir gap aytgandim. “Ko‘pincha oila buzilishiga ota-ona ham sabab bo‘lib qoladi. Ayollardan, erimni yaxshi ko‘rardim, yashardim, qaynonam yashatmadi, onam qo‘ymadi, degan gaplarni eshitib qolamiz. Ba’zida shunday ham bo‘ladi”, deb monologim orasida gapirdim. Konsert tugatib chiqsam, bir ayol yig‘layapti, ko‘zi to‘la yosh. Meni kutib turgan ekan. “Konsertingizga kulish uchun kelgandim, meni yig‘latdingiz”, dedi. Men nima qildim desam, “O‘g‘lim kelinimni olib, ro‘zg‘orini alohida qilib chiqib ketdi. Men bilan yashamadi”, deyapti. Uni gaplaridan men o‘zimni aybdordek his qilib yubordim. Avvalo gaplarim ta’sir qilganidan xursandman, lekin bu gapni hamma uchun aytgandim dedim.
O‘sha konsertimdan keyin ajrim yoqasida turgan ayollar eriga, erlar ayoliga qo‘ng‘iroq qilganlar bo‘lgan.
Ayolim bir kun sartaroshxonaga borganida, ayollarning o‘zaro gapini eshitib qolibdi. “Avaz Oxunning konsertiga kirgandim, oila, ajrimlar haqida gapirgan edi, erimga telefon qilib, ertasi kuni yarashib oldim”, debdi. Shu narsalar uchun ham yashagim keladi. Bitta bolani yetim qilishdan, oilani ajrashib ketishidan saqlab qolish ham ijod qilishga kuch beradi, deydi qiziqchi.
“Bizning erkaklar hol so‘rashdan avval ovqat so‘raydi”
— Bemehrlik, xiyonat, e’tiborsizlik — shunday xatolarni ayol kishi kechirmasligi mumkin. Ayol shirin so‘zga erib ketadi, lekin erkak shuni ham aytolmasa nima qilib yuribdi. Ruslar yoki boshqa boshqa Yevropa xalqlarida erkaklar ayolini o‘pib ishga ketadi, kelganida ham yaxshi o‘tiribsanmi deb o‘pib qo‘yadi. Bizni erkaklar esa ayolini ko‘rsa nima ovqat qilding, deydi. Nega shunday? Avval ahvolini so‘ra, erkalat, gul ko‘tarib kel yoki yuzidan o‘pgin-da, keyin so‘ra nima ovqatligini. Menimcha bu bizga ota-bobolarimizdan meros bo‘lib qolgan.
Ayollar orzu-havasga beriluvchan. Bir ayol Instagram’da o‘tirib, baxtsiz bo‘lib qoldim dedi. Bu eng og‘ir dard. Baxtini ko‘z-ko‘z qiladiganlar bor. Erim mana shunday gul olib keldi, bunday mashina olib berdi, erim, erim… Hammada ham imkoniyat yo‘q-da. Ayollar falonchidan qayerim kam deydi. Shuning ortidan ajrashib ketayotganlar ham oz emas, deydi so‘z ustasi.
“Erkak ayolning azobini o‘ndan birini ham his qilmaydi”
— Erkak bu hayotda ayol chekkan azobning o‘ndan birini ham chekmasa kerak. Bola dunyoga keltirishning o‘zi erkak o‘z hayotida ko‘rgan-kechirganini bir tomonga surib qo‘ya oladi. Bu juda katta jarayon. Farzand ayolning vujudida paydo bo‘lganidan boshlab, dunyoga keltirib tarbiya qilgunigacha bo‘lgan jarayonda ayolning azobi, mehnati, umuman shu voqelikning o‘zi erkakning butun boshli azobini bir chetga surib, yutib qo‘ya oladigan darajada, deydi u.
Izoh (0)