Deborra-Li Ferness 2025-yil 23-may kuni Hyu Jekman bilan rasman ajrashish uchun ariza berdi va aktyor bilan 2023-yildan buyon birga yashamayotganini eʼlon qildi. Bunga aktyorning Brodvey myuziklidagi hamkasbi Sutton Foster bilan xiyonati sabab bo‘lgan. Deborra-Li birinchi marta sukunatni buzib, shaxsiy hayotidagi murakkab davr tafsilotlari bilan o‘rtoqlashdi.
“Men xiyonatning og‘riqli yo‘lini bosib o‘tgan barchaga hamdardman. Bu chuqur jarohat bo‘lib, u qalblarni tilka-pora qiladi. Biroq men Xudoga ishonaman. Ushbu ishonch menga 30 yillik nikohning buzilishini boshdan kechirishga yordam berdi. Ushbu tajriba menga ko‘p narsani o‘rgatdi.
Biz og‘ir qiyinchiliklarga duch kelsak ham, ular bizni yaxshilikka — oliy maqsadimiz tomon eltadi. Ushbu jarayon og‘riqli bo‘lishi mumkin, biroq kelgusida bu — qadriyatlarimiz doirasida o‘zligimizga qaytish hamda erkinlik degani”, deya o‘z fikrlarini bildirdi Ferness.
U o‘z bayonotini muhim bir nuqta bilan yakunladi:
“Biz hammamiz o‘zimizning shaxsiy yo‘limizdamiz va men hayotimizdagi munosabatlar tasodifiy emasligiga ishonaman. Biz odamlarga intilamiz, ularni hayotimizga taklif qilamiz, saboq olish, anglash va o‘zimizning jarohatlangan qalbimizni davolash uchun... Men undan minnatdorman”.
Izoh (0)