Mashhur aktrisa Emma Stounning asl ismi Emily Jin bo‘lib, u ikkinchi ismini hech qachon ishlatmagan. Gollivudda allaqachon Emily Stoun borligi sabab, qiz ismini Emma deb o‘zgartirishga majbur bo‘ladi. Qiziq tomoni, Stoun familiyasi uning buvisi tomonidan o‘ylab topilgan: ular Shvetsiyadan AQSHga ko‘chib kelgan va u yerda ularni Stenlar deb tanishar edi. Ushbu maqolada Gollivud yulduzining qanday qilib mashhurlikka erishgani haqida bilib olasiz.

Aktrisa Arizonaning Skottsdeyl shahrida o‘sgan. U bolaligida teatr san’atiga qiziqib qoladi. Maktab yillarida u ko‘pincha sahnada chiqishlar qilib, aktrisa bo‘lishni orzu qilardi. Shu maqsadda, uning onasi Los Anjelesga ko‘chib o‘tishga rozi bo‘ldi (bu 2003-yilda, Emma 14 yosh bo‘lganida sodir bo‘ldi) va qizini uyda o‘qitishni tanladi.

Emma Stoun aslida tabiiy sarg‘ish sochli, bu esa uning shved ajdodlari bilan bog‘liq. Ammo buni deyarli hech kim bilmaydi. U har doim sochlarini qizil rangga bo‘yab yuradi.
“Los Anjelesga kelganimda, agentim: ‘Sarg‘ish sochli qizlar faqat qo‘llab-quvvatlovchi qizlar rollarini o‘ynaydi’, dedi. Rostdan ham, menga jiddiy rollar nasib qilmasdi. Ehtimol, bu agentimning muammosi bo‘lgan. Keyin sochimni qora rangga bo‘yadim va oradan bir hafta o‘tib yaxshi rol oldim. ‘Superbad’ filmidagi kastingga qora soch bo‘lib bordim, lekin ular menga sochimni qizilga bo‘yashni taklif qilishdi. Shundan beri shu rangda yuraman”, deydi Emma.
Emma Stounning karyerasi 2010-yilda chiqqan “Sodda a’lochi” filmi bilan keskin yuksala boshladi. Film aslida “Easy A” deb nomlanadi va bu nom Nataniyel Xotorning “Qizil harf” romaniga ishora qiladi.

“Berdmen” va “La-La Lend”
2012-yilda chiqqan “Yangi O‘rgimchak odam” filmidan so‘ng, Emma Stoun juda talabgir aktrisaga aylandi. Unga turli kinolarga takliflar ko‘p bo‘ldi va u eng qiziqarli loyihalarni tanlash imkoniyatiga ega bo‘ldi.

Aleksandro Inyarrituning 2014-yilda suratga olingan “Berdmen” filmidagi Sem rolini ijro etishi aktrisaga eng yirik mukofotlarga nomzodlik va bir nechta kichik sovrinlarni olib keldi. Ushbu komediyaning suratga olish jarayoni katta sarguzasht bo‘lgan. Film butun dunyo bo‘ylab katta shov-shuv bo‘ldi va tomoshabinlar orasida yuqori reytingga ega chiqdi.

Emma Stounning aktyorlik va qo‘shiqchilik iste’dodi to‘la-to‘kis 2016-yilda chiqqan “La-La Lend” filmida namoyon bo‘ldi. Ushbu filmda bosh rolni ijro etgani uchun u bir qancha sovrinlarni, jumladan “Oskar” va “Oltin Globus”ni qo‘lga kiritdi.
Yaqinda namoyish etilgan “Kruella” filmida ham Emma Stoun nafaqat bosh rolni ijro etadi, balki qo‘shiq ham kuylaydi.
Shaxsiy hayot

Emma Stounning shaxsiy hayoti haqida ko‘p ma’lumotlar mavjud emas. 2008–2010-yillarda u “Yalang‘och barabanchi” filmida hamkasbi bo‘lgan Teddi Geyger bilan uchrashgan. Keyin to‘rt yil davomida “Yangi O‘rgimchak odam” filmidagi bosh rol ijrochisi Endryu Garfild bilan munosabatda bo‘lgan va bir rol o‘ynagan. Bu munosabatlar jiddiy bo‘lgan, hatto ular turmush qurishga tayyorlanishgan. Ammo 2015-yilda kutilmaganda ajralishgan. Hozirgacha ikkisi ham ajrashish sabablarini ochiqlamaydi.

Shundan so‘ng tez orada Emma televideniye rejissyori Deyv Makkeri bilan munosabat qurdi, ammo ular birga omma oldida faqat 2019-yildan boshlab ko‘rinish berdi. 2020-yilda juftlik turmush qurdi, 2021-yil 31-martda esa qiz farzandli bo‘ldi.
Izoh (0)