Ijtimoiy tarmoqlarda Yulduz Usmonovaning Namanganda o‘tkazilgan konsert dasturiga kirishda tartibsizliklar bo‘lgani haqidagi videolar tarqaldi. “Daryo” so‘roviga ko‘ra, Namangan viloyati hokimining madaniyat masalalari bo‘yicha maslahatchisi Akbarali Asqarov vaziyat bo‘yicha quyidagilarni maʼlum qildi.
— Shu yilning 28-may kuni “Afsonalar vodiysi” tematik parkining amfiteatrida “Zo‘rnavo” masʼuliyati cheklangan jamiyati vakillari O‘zbekiston xalq artisti Yulduz Usmonovaning konsertini tashkil etgan. Konsert va ommaviy tomoshalarni tashkil etishda hokimiyat nazorati emas, bu haqida faqatgina Ichki ishlar organlari xabardor qilinadi, xolos. Shu bois, biz konsert o‘tkazilishi haqida ogohlantirilmaganmiz. Tadbirkor amfiteatr masʼullari bilan kelishgan holda, konsertni tashkil etib, chiptalarni aholiga sotgan. Amfiteatr 2 300 kishiga mo‘ljallangan va taxminimizcha, chiptalar belgilanganidan ancha ko‘p sotilgan. Shu boisdan tartib buzarlik yuzaga kelgan. Holat bo‘yicha hech kim jarohat olmagan, ammo ko‘plab insonlar qo‘llaridagi chipta bilan tashqarida qolib, sarson bo‘lishgan, deydi Namangan viloyati hokimining madaniyat masalalari bo‘yicha maslahatchisi Akbarali Asqarov.
Mazkur vaziyat bo‘yicha IIV Jamoat xavfsizligi departamenti axborot xizmati rahbari Muzifa Sultonova quyidagilarni ma’lum qildi.
— Tadbir tashkilotchilari tomonidan taklifnoma asosida kiradigan fuqarolar uchun amfiteatrning oldi tomonidan qo‘shimcha 500 ta o‘rindiqlar o‘rnatilgan. Konsertga chipta bilan tashrif buyurgan aksariyat fuqarolar o‘zlari bilan 2-3 ta farzandlarini olib kelgan va ular boshqa fuqarolarning o‘rindiqlariga o‘tirib olgani oqibatida tartibsizlik yuzaga kelgan. Tartibni saqlash uchun hududiy 100 ga yaqin ichki ishlar xodimlari, Milliy gvardiya va Favqulodda vaziyatlar boshqarmasining shaxsiy tarkibi xizmatga jalb etilgan. Shu boisdan, konsert dasturini o‘tkazish vaqtida hech qanday favqulodda holat yuzaga kelgani yo‘q, deydi Muzifa Sultonova.
Ma’lum qilinishicha, hozirda tergovga qadar surishtiruv ishlari olib borilmoqda.
Izoh (0)