Mashhur amerikalik reper, prodyuser va tadbirkor Snoop Dogg (haqiqiy ismi Kelvin Kordozar Brodus) o‘zi haqidagi biografik film ustida ishlashni boshladi. Filmni Universal Pictures kino kompaniyasi hamda Snoop Dogg asos solgan Death Row Pictures prodyuserlik studiyasi birgalikda suratga oladi. Bu haqda Deadline nashri xabar berdi.
Film Snoop Doggning hip-hop san’atiga kirib kelishi, 1990-yillarda ommaga tanilishi, musiqiy va kinematografik faoliyatidagi muhim bosqichlar, shuningdek, uning biznes olamidagi muvaffaqiyatlarini yoritib beradi.
Rejissyorlikni taniqli kinoijodkor Kreyg Bryuer o‘z zimmasiga oldi. U avvalroq 2005-yilda suratga olingan “Shovqin va oqim” (“Hustle and Flow”) nomli film orqali tanilgan. Ushbu drama DJ ismli reperning mashhurlikka erishish yo‘lini hikoya qiladi. Film “Oskar”ning “Eng yaxshi original qo‘shiq” (“It’s Hard Out Here for a Pimp”) nominatsiyasida g‘olib bo‘lgan.
Filmning prodyuserlari Snoop Doggning o‘zi, taniqli prodyuser Brayan Greyzer hamda Death Row Pictures prezidenti Sara Ramaker bo‘ladi.
Mazkur biografik film Death Row Pictures va NBC Universal Entertainment & Studios o‘rtasidagi yangi hamkorlik doirasida amalga oshirilayotgan ilk loyiha hisoblanadi.
Universal Pictures ilgari ham hip-hop madaniyatiga bag‘ishlangan muvaffaqiyatli loyihani taqdim etgan. 2015-yilda chiqqan “Ko‘cha ovozi” filmi N.W.A. guruhi haqida hikoya qiladi. Loyiha katta muvaffaqiyatga erishib, “Eng yaxshi original ssenariy” yo‘nalishida “Oskar” mukofotiga nomzod bo‘lgan va global miqyosda 200 million dollardan ortiq daromad keltirgan.
Izoh (0)