Amerikalik mashhur reper va prodyuser Snup Dogg (Snoop Dogg) buyuk britaniyalik oshpaz va teleboshlovchi Gordon Ramzi bilan hamkorlik qilish niyatida ekanini aytdi.
53 yoshli san’atkor yaqinda Shotlandiyaning “Seltik” futbol klubiga bo‘lgan qiziqishini bildirgan va kelgusida klubga sarmoya kiritishni istayotganini aytgan. Bu orzusining davomi sifatida u stadion yonida burgerlar sotiladigan furgon tashkil etmoqchi.
“Men futbol stadioniga burger furgonini olib borib, muxlislarga stadiondagi taomlar ham sifatli va mazali bo‘lishi mumkinligini ko‘rsatmoqchiman. ‘Seltik’ muxlislari buni qadrlashadi. Buni o‘z ko‘zim bilan ko‘rish uchun ular uchun o‘zim xizmatda bo‘laman”, dedi xonanda The Sunday Mail nashriga bergan intervyusida.
Snup Dogg uchun bu pazandalik sohasidagi birinchi qadam emas. U 2018-yilda From Crook to Cook nomli oshpazlik kitobini chop etgan bo‘lib, unda o‘zining sevimli retseptlari, jumladan soul food, ya’ni afro-amerikaliklar milliy taomlariga oid ma’lumotlar jamlangan. Kitob o‘zbek tilida “Jinoyatchilikdan oshpazlikkacha” deb tarjima qilinishi mumkin.
Muallifning so‘zlariga ko‘ra, mukammal burger yaratish uchun taomga mehr berish lozim. Shuningdek, sifatli pishloq, yaxshi go‘sht va o‘ziga xos ziravorlar aralashmasi ham zarur.
Izoh (0)