O‘zbek san’ati rivojiga munosib hissa qo‘shgan taniqli bastakor, “Do‘stlik” ordeni sohibasi, O‘zbekistonda xizmat ko‘rsatgan madaniyat xodimi Dilorom Omonullayeva 66 yoshda vafot etdi. Bu haqda marhumaning yaqinlari ijtimoiy tarmoqlarda ma’lum qilishdi.
Bastakorning o‘limiga uzoq davom etgan kasallik sabab bo‘lgan.
Dilorom Omonullayeva 1959-yil 1-oktyabrda Toshkent shahrida musiqachilar oilasida tug‘ilgan. V.Uspenskiy nomidagi maxsus musiqa maktabida fortepiano sinfi bo‘yicha ta’lim olgan. 1978-yilda Moskvadagi P.I.Chaykovskiy nomidagi konservatoriyada tahsil olgan va professor Rumil Vildanov sinfini imtiyozli diplom bilan tamomlagan. 1993-yildan V.Uspenskiy nomidagi maxsus musiqa maktabida o‘qituvchi bo‘lib ishlab kelayotgan edi.
Dilorom Omonullayeva ijodiy faoliyati davomida ko‘plab taniqli xonandalar — Azimjon Soliyev, Obid Dadajonov, Xurshid Hotamov, Farrux Zokirov kabilar uchun musiqalar bastalagan. Ularning “Siz yoqqansiz menga hamisha”¸ “Sen qaydasan”¸ “Yomg‘ir yog‘di”, “Ikki daraxt”, “Sen qaydasan”, “Azizim“, “Saraton” va boshqa qo‘shiqlari shuhrat qozongan.
Izoh (0)