Xonanda va aktrisa Mayli Sayrusning Something Beautiful nomli filmi premyerasida muxlislar tartibsizliklar uyushtirdi. Chunki ular bu tadbirda qo‘shiqchi sahnaga chiqib, konsert beradi, deb o‘ylashgan.
Something Beautiful nomli musiqiy albomga qo‘shimcha tarzda yaratilgan vizual albom namoyishi kutilmaganda Sayrus, uning prodyuseri Panos Kosmatos, film mualliflari Yakob Bixenman hamda Brendon Uolter ishtirokidagi munozaraga ulanib ketdi. Bu esa tomoshabinlar noroziligiga sabab bo‘ldi. Ular konsertga chipta olganman, deb o‘ylashgan edi. Zalning ichidan: “Biz buni konsert deb o‘ylagan edik! Axir 800 dollar to‘lab kirdik!” degan xitoblar keldi.
Shundan so‘ng muxlislarning noroziligi kuchaya boshladi va bu Sayrusni ularning talabini bajarishga majbur qildi. Natijada xonanda The Climb qo‘shig‘idan to‘rt qator kuyladi.
Keyinchalik ma’lum bo‘lishicha, ko‘plab mehmonlar chiptalarni internet va olibsotarlar orqali xarid qilishgan. Chayqovchilar bu chiptalarni xuddi qo‘shiqchining “Cheksiz yozgi ta’til 2025” nomli gastrol turiga oid konsertdek ko‘rsatib, reklama qilishgan.
Bu xabar internetda keng muhokamalarga sabab bo‘ldi. Ammo ko‘plab muxlislar san’atkorni himoya qildi: “Ba’zi muxlislar juda qo‘pol va o‘ziga bino qo‘ygan bo‘ladi. Ular bu qilmishidan uyalishi kerak”.
Avvalroq Mayli Sayrus sog‘lig‘idagi muammolar tufayli karyerasini yakunlamoqchi bo‘lganini aytgandi. Xonanda konsert paytida tibbiy yordamga muhtoj bo‘lganidan keyin shou-biznesdan ketish haqida o‘ylagan.
Izoh (0)