O‘zbekistonda tug‘ilib-o‘sgan, hozirda Rossiyada yashab, ijod qilayotgan xonanda Sogdiana ijtimoiy tarmoqdagi sahifasida oilasidagi og‘ir yo‘qotish haqida xabar berdi. San’atkor eng yaqin insoni — onasi Larisa Fedorinskayadan ayrilganini ma’lum qildi.
“Bugun onajonimdan ayrildim. U har doim har narsani yengib o‘tishga qodirdek tuyulardi, go‘yoki u doim yonimda bo‘ladigandek edi. Juda sog‘inyapman, onajon…” deb yozdi Sogdiana.
Larisa Fedorinskaya umr bo‘yi shifokor bo‘lib ishlagan. U qizining san’at yo‘lidagi sa’y-harakatlarini bolaligidan qo‘llab-quvvatlab kelgan. Sogdiananing ilk sahna liboslarini ham aynan onasi tikib bergan.
Ma’lumot o‘rnida: Sogdiana (haqiqiy ismi Oksana Nechitaylo) sharqona ko‘rinishi va ajoyib taxallusiga qaramay, ukrain millatiga mansub. Oksana 1984-yil 17-fevralda Toshkent shahrida tug‘ilgan. Uning oilasi harbiy xizmatchi bo‘lgan bobosi tufayli O‘zbekistonga kelib, qo‘nim topgan. Cherkov xorida qo‘shiq kuylagan buvisi Sogdianani musiqaga, qo‘shiq aytishga mehr uyg‘otgan.
Maktabni tugatgach, O‘zbekiston davlat konservatoriyasining estrada bo‘limi fakultetiga o‘qishga kiradi. Oksana “Mening yurtim kuylari” respublika estrada xonandalari tanlovi laureati bo‘ladi. So‘ng 17 yoshida o‘zbek estrada sahnasini zabt eta boshlaydi. Rus, o‘zbek va ingliz tillaridagi qo‘shiqlaridan iborat “Mening ko‘nglim” nomli birinchi albomini chiqaradi. Ikki yil o‘tgach, u “Nihol” davlat mukofotiga sazovor bo‘ladi.
Uning “Yurak mahzun”, “Netay”, “Meni esla” kabi qo‘shiqlari xit bo‘lgan. Xonanda “Xo‘ja Nasriddin: o‘yin boshlandi”, “Sug‘diyona”, “Yangi yil parisi” kabi filmlarda ham rol ijro etgan.
Izoh (0)