Zohida Umarova “Ayol qalbi” ko‘rsatuviga intervyu berdi. U suhbat davomida qizi Madlenning “Ovoz”dagi ishtirokidan faxrlanishi, Yorqinxo‘ja oxirgi puliga onasiga sovg‘a olib kelgani va farzandlarining tarbiyasida ishtirok etolmagani haqida gapirdi.
“Farzandlarimning tarbiyasida ko‘p ishtirok etolmaganman”
— Yorqinxo‘jani yaxshi ko‘rmay bo‘lmaydi. U haqiqiy erkak bo‘ldi, singillarini turmushga berdi. Mening qo‘limdan hech nima kelmasdi. Sanʼatkor bo‘lsam, qizlarimni qanday uzataman, deb har kuni kechasi o‘ylardim. Sanʼatkor ayolning orqasida suyanchig‘i bo‘lmasa, uning atrofida ming xil gap yuradi. Men diqqat markazidan chiqib ketdimmi? Endi hamma taniydigan Zohida Umarova emasmanmi, o‘sha qozonda qaynolmayapmanmi? Allohim, Menga unday qilmagin, axir men kuchni yelib-yugurib, xalqdan olib yana ularga berib, olaman-ku. Zavq bilan yashaydigan odamman, bu yerdan chiqib ketishim mumkin emas, deb Xudoga yolvorardim.
O‘g‘lim katta sahnalarga chiqib, xalqning eʼtirofiga sazovor bo‘lganida, “Allohim, menga shunday qo‘rg‘on berding-a”, dedim. U mendan o‘n barobar fayzliroq chiqdi, unda ilohiy nimadir bor. Undan mingdan ming roziman. U meni ham ona, ham ayol, ham sanʼatkor sifatida borimcha qabul qila oldi. Xatolarim, gunohlarimga qaramay qabul qildi. Rosti, Yorqinxo‘ja katta sahnaga chiqmasidan oldin Zohida Umarova bo‘lishim menga juda yoqardi. Lekin o‘ta darajada mashhurlikka talabgor bo‘lmaganman.
Farzandlarimning tarbiyasida ko‘p ishtirok etolmaganman. Ko‘p ishlardim, bolalarga vaqtim yetmasdi. Bu borada faqat Alloh yordam berdi, qancha yig‘lagan bo‘lsam ham, ota-onamga hech qachon bildirmaganman. Yolg‘iz ayolning zabardastligi uning sabrida, deyman, deydi sobiq xonanda.
“Zohida, sen tamagir onamisan?”
Mashhur san’atkorning onasisiz. O‘g‘lingiz “Odamlarning orasida o‘zingizni bir pog‘ona balandda tuting, har holda mening onam ekaningizni xalq biladi”, deb aytadimi, degan savolga u shunday javob berdi:
— Yorqinxo‘janing o‘zida kibrlanish yo‘q bo‘lsa, menga qanday qilib “Mening onamsiz, endi sizni xalq taniydi, biroz havolanishingiz, o‘zingizni boshqacharoq tutishingiz kerak” deydi? U bunday deyolmaydi, chunki uning o‘zi unday emas, deydi Zohida Umarova.
Ona farzandlariga “meni boqishing kerak, seni katta qildim” deyishi noto‘g‘ri. Tamagirlik uchun farzand tarbiyaladimmi? Manfaat kutib shu darajaga olib keldimmi? Zohida Umarova, sen tamagir onamisan, deyman. Har bir onaga aytmoqchiman — na qizdan, na o‘g‘ildan, na kelindan manfaat kutmang. Farzand tug‘ilishi uchun Xudo bizni bir sababchi qildi, xolos. Bolalarim men uchun nimadir qilishidan uyalaman. Ko‘chadan biror narsa ko‘tarib kelsa ham, yo‘q o‘zingda qolaversin, deyman. Chunki o‘zim shunday onaning qiziman.
Dadam bilan onamning birgina “Sendan roziman, qizim” degan gaplarini eshitish uchun ular yoqtiradigan narsalarni ko‘tarib, uyga qarab yugurardim. Ertangi kunim uchun yeyishga hech nimam qolmasa ham, ularga berishga oshiqardim. Ularning xursandchiligini ko‘rgim kelardi. Hozir o‘g‘lim xuddi shunday. Bir kuni atir olib kelibdi. Pulim yo‘q edi, lekin siz uchun topdim. 435 dollarga oldim, oyi, sizga hidlar yoqadi-ku, falonchi brendniki, dedi. Men u brendni bilar ekanmanmi, nima bo‘lsa ham, sepib ketaveraman. Nega ovora bo‘lding desam, sizning reaksiyangizni ko‘rgim keldi, dedi. Ostonada turib qaytar dunyo ekan-da, deb yig‘ladim, deydi Zohida Umarova.
“Yomon izoh yozishga uyaling endi”
— Qizim Madlenni dunyoga keltirganimda, men dunyoga bitta yulduz olib keldim, deganman. Jonim xalqim, nima deb yozsangiz ham, roziman. Faqat bir narsani aytmoqchiman — “Ovoz”da Ozodbek Nazarbekov Madlenni sahnada ko‘rgunga qadar qudasining qizi kuylayotganini bilmagan. Sahnada ko‘rgandan keyingina, iya Madlen-ku, deb qoldi. Shundan keyin ham yomon izoh yozishga uyaling endi. Qizim kuylayotgan paytda Ozodbek bilan Sevaraga qaradim, ikkalasi ham emotsiya bilan o‘tirgandi. Ana, qizimni tanlamasangiz bo‘lmaydi, deb ichimda aytib o‘tirdim. Har bir ona bolasining kamolini ko‘rib, yutug‘i bilan maqtangisi keladi. E, bolamning zo‘r bo‘lishini nima qilaman, deydigan ona yo‘q-ku. Meni ham shunday qabul qiling, iltimos. Men ham uning sanʼatidan, kamolidan maqtangim keladi. Ko‘proq odamlarga ko‘rsatgim keladi, chunki onaman, dedi Zohida Umarova.
Izoh (0)