24 yoshida beva qolgan instabloger, stilist Kamola Oripovaning bugungi kunda to‘rtta farzandi bor. Baxtli ayol bu kunlarga osonlikcha erishmagan. Kamola Oripova va Hasan Maqsudovlar o‘z hayot yo‘llari haqida “Ikkalamiz” ko‘rsatuvida gapirib berdi.
“Men Hasan akani emas, ular meni tanlaganlar”
— Dastavval ijtimoiy tarmoq orqali, bir-birimizni hayotda ko‘rmasdan turib tanishganmiz. Ammo ularning muomalalari, gapirayotgan gaplari bilan qilayotgan amallari bir-biriga to‘g‘ri kelayotgani menga yoqqan.
Birinchi marta yozganlarida pandaning rasmini jo‘natib, pandaga o‘xsharkansiz, degan. Mening eng og‘riqli nuqtam vazn bo‘lgani uchun bu biroz haqoratli tuyilgan, ammo ular uchun erkalash edi. Shu tariqa munosabatlar boshlanib ketgan. U boshida uydagilariga qanday tushuntirishni o‘ylab cho‘chigan. Chunki bo‘ydoq, hali turmush qurmagan inson edi. Bilasiz, bizning o‘zbek mentalitetida bunga chuqur eʼtibor berishadi, deydi Kamola Oripova.
— Baribir ijtimoiy tarmoqdan insonning xarakterini aniq bilish imkonsiz. Ammo Kamola bilan ko‘rishgandan, gaplashgandan keyin ham mening u haqidagi tasavvurlarim ham, fikrlarim ham o‘zgarmagan. Faqat munosabatlar boshlanayotgan payti uydagilarimga qanday tushuntiraman deb biroz qo‘rqqanman. Lekin men allaqachon niyat qilib, o‘zim uchun hal qilib bo‘lgan edim. Barchasi yaxshi ko‘rganligim va hurmat qilganligim sababli edi, deydi blogerning turmush o‘rtog‘i Hasan Maqsudov.
“Afruz” guruhidagilar noto‘g‘ri o‘ylashdi”
— Hasan aka asli Namanganning Pop tumanidan, ammo biz ijtimoiy tarmoqda tanishganimizda Moskvada edi. Men bilan uchrashgani Toshkentga kelganida o‘zim aeroportdan kutib olganman. Baribir hayotda ko‘rishib, gaplashib olishimiz kerak edi. Ular kelganlaridan so‘ng So‘qoqqa borganmiz. Avtomobilni men boshqarganman. So‘qoqqa yetib borguncha menga umuman gapirmaganlar. Men esa hayotda yoqmadim, nega gapirmaydilar, endi nima bo‘ladi deb o‘ylashni boshlaganman. Ammo ular 4 soat samolyotda charchagan ekanlar. So‘qoqda ovqatlanib bo‘lganimizdan so‘ng “tapchan”da biroz mizg‘ib olganlar. Keyin ketamiz deb turganimizda ne ko‘z bilan ko‘rayki, Zafar va Jamshid — “Afruz” guruhi yonimizdagi “tapchan”da ekan.Nima qilishni bilmay, assalomu alaykum deganman. Endi bir-birimizni taniymiz, shou-biznes odamlarimiz, ular nima deb o‘ylaydi, turmush o‘rtog‘i bo‘lmagan inson bilan tog‘ma-tog‘ yuribdi deb noto‘g‘ri o‘ylashadi deb qo‘rqqanman. Keyin Hasan akam, hech narsa bo‘lmaydi, men o‘zimni bilaman, oilamni ham bilaman, sen hammasini menga qo‘yib ber deganlar va men hammasini ularga qo‘yib berganman, deydi Kamola Oripova.
“Yo uni tanlaysan, yo bizni”
— Oilamni ko‘ndirishga ikki yil vaqt ketgan. Moskvadaligimda ular menga uylanish uchun qiz topib bo‘lishgan edi. Ammo men o‘rtoqlarimnikidaman, tog‘daman deb Namangandan Toshkentga kelib-ketib yurganman. Uydagilarim buni bilib qolib, Toshkentga ham jo‘natmay qo‘yishgan edi. Biroz chekinish ham bo‘lgan, ammo Kamolani tashlab ketgim kelmagan. Chunki uning oilasi va atrofidagi yaqinlari bilan tanishib bo‘lgan edim.
Onam “Yo uni tanlaysan, yo meni”, deganidan keyin o‘ylab olish uchun qaytib yana Moskvaga ketganman. U yerda to‘rt oy yashab, yana Toshkentga qaytganman. Shu orada nikoh o‘qitib, qonuniy oila qurib birga yashashni boshlaganmiz. Yana qaytib Rossiyaga ketdim va birinchi farzandimiz tug‘ilishida kelib, bir oy yashab yana Moskvaga qaytganman. Ko‘p borib-kelishimning sababi ota-onam meni Moskvada deb bilishar edi. Toshkentga kelib-ketib yurganimni, oila qurganimni keyin bilishgan. O‘shanda hammasini uydagilarimga tushuntirganman.
Birinchi farzandim bir yoshdan o‘tganidan so‘ng onamning o‘zlari kelganlar, deydi Hasan Maqsudov.
“Homiladorligimda turmush o‘rtog‘imni uylantirmoqchi bo‘lishgan”
— Qaynonam bilan ko‘rishganimda va ular meni qabul qilganlarida chuqur halovat his qilganman. Chunki homiladorligimda ular qiz topib, turmush o‘rtog‘imni uylantirishmoqchi bo‘lishgan. Ammo hozir hammasi yaxshi. Qaynonamni judayam yaxshi ko‘raman. Ikkala quda ko‘rishganida bizni ularga keragimiz ham bo‘lmay qoladi, deydi Kamola Oripova hazil bilan kulib.
“Bo‘ydoq insonga turmushga chiqaman deb niyat qilganman”
— Allohning izni bilan turmushim o‘xshamadi. Beva qoldim, endi nima qilaman deb o‘ylaganman. Turmush qurmayman deb katta gapirmaganman, ammo qursam ham oilasi yo‘q, bo‘ydoq insonga turmushga chiqaman deganman. Chunki qonuniy ajrashgan bo‘lsa ham har kimning ortida o‘tmishi, sobiq rafiqasi, oilasi, farzandlari bo‘ladi. Bu narsadan qo‘rqqanman. Birovning hayotiga kirishni xohlamaganman. Shuning uchun bu masalada endi gapirishni xohlamayman ham, deydi bloger.
“Qayta hayot berilganda ham shu hayotni tanlagan bo‘lar edim”
— Nolimayman, hayotim yaxshi. Ota bo‘lganimdan so‘ng turmush o‘rtog‘imni yanayam hurmat qilishni boshladim. Keyingi hayotimda ham shu hayotimni tanlagan bo‘lardim. Shu oilamni, shu ayolimni, u bilan farzandlarimizni birga katta qilishni...
Bilolxo‘ja ham meni yaxshi qabul qilgan. U bilan erkakcha gaplashib turamiz. Hozir 18 ga kiryapti, ulg‘ayyapti. Shu sababli biroz munosabatlarimiz qiyinroq tus olayotgandek tuyilyapti, ammo ayolim bu borada bizga yordam beryapti, deydi Hasan Maqsudov.
“Mening premyeram — qizlarim”
— Men hech qachon qiz farzandim bo‘ladi deb o‘ylamaganman, xayolimga ham kelmagan, tasavvur ham qilmaganman. Bilolxo‘jani ham yaxshi ko‘raman, u ham farzandim. Ko‘pchilik “O‘g‘lingiz qayerda yashaydi?”, — deb savol beradi. Farzand qayerda yashashi mumkin? Bilolxo‘ja ijtimoiy tarmoqlarda ko‘rinishni istamaydi. Bu degani u men bilan yashamaydi degani emas.
Ko‘pchilik o‘zimdagi vaziyat o‘g‘limda ham bo‘lib qolsa, o‘g‘limga olib beramanmi, yo‘qmi shuni ko‘p so‘rashadi. Avvalo taqdir. Agar men turmush o‘rtog‘imni yaxshi ko‘rganchalik yaxshi ko‘rsa, qalban yaqin bo‘lsa, hurmat qilsa, mehrini bera olsa, men yo‘q demayman, deydi instabloger farzandlari haqida.
Izoh (0)