Insta va YouTube bloger Maryam Tillayeva Fransiyaning diqqatga sazovor maskani Lojuvard sohillarida unashtirish taklifini olgani haqida o‘zining Instagram sahifasida ma’lum qildi. Arno bilan u joriy yil 2-yanvar kuni Fransiya Alpida joylashgan Kurshevel tog‘-chang‘i kurortida tanishishgan. Hozirda “O‘yin ustasi” (Мастер игры) realiti-shousida ishtirok etayotgan Maryam Voice nashriga bergan intervyusida bunday taklifni kutmagani haqida so‘zlab berdi.
“Arno doim avgust oyida qo‘lingni so‘rayman, derdi. Men esa buni hazilga yo‘yardim, chunki u tez-tez hazillashar va doim kulgili gaplar bilan atrofdagilar kayfiyatini ko‘tarar edi.
Munosabatlarimiz jiddiy ekanini ta’til vaqtida eng yaqin dugonamni ko‘rib qolgach, angladim. O‘zimcha: ‘Bu yerda u nima qilib yuribdi?’ dedim. Dugonam esa: ‘Mening tug‘ilgan kunim-ku, shuning uchun Arno ham meni bu yerga taklif qildi’, dedi. Men: ‘Mayli, mantiqan to‘g‘ri’, deb qo‘ya qoldim.
Ammo ular o‘sha kuni doim pichirlashardi, Arno esa undan nimalarnidir so‘rab yurardi. Shunda ichimda shubha paydo bo‘ldi. Keyin dugonam menga hammasini aytib berdi. Bilishimcha, Arno ikkisi uzuk masalasida maslahatlashgan ekan. Eng qizig‘i, dugonam ingliz tilida gapiradi, Arnoning ingliz tili darajasi esa unchalik yaxshi emas. Ularning muloqoti oddiy va kulgili tarzda kechgan”, deya eslaydi Tillayeva.
Ma’lum bo‘lishicha, Arno Maryamdan uch yosh kichik va o‘zining shaxsiy biznesi bor. Maryam Tillayeva Arno bilan dastlab shunchaki do‘st bo‘lgan:
“U bilan oddiy do‘stona munosabatda edik. Ammo O‘zbekistonga safardan so‘ng Arno butun oilam, do‘stlarim va mening ko‘nglimni zabt etdi. U men uzoq izlagan insonim: u meni yaxshi tushunadi, chin dildan sevadi. Bu munosabatlar shunchalik sokin va xotirjam-ki, unda na janjal, na tahqirlashlar bor. Rishtalarimiz haqiqiy sevgi va o‘zaro hurmatga asoslangan”, deydi bloger.
E’tiborlisi, Maryam va Arnoni tabriklaganlar orasida mashhur milliarder, Amazon asoschisi Jeff Bezos ham bo‘lgan.
“Hammasi juda qiziq va tasodifiy tarzda o‘tdi. Arno menga turmush qurishni taklif qilgan kuni biz Jeff Bezos dam olayotgan mehmonxonada edik. Keyin La Guerite restoraniga nishonlashga bordik. U yerda ham Bezos bor ekan. Bilasizmi, yaqinda u Loren Sanchesga uylangani shov-shuvga sabab bo‘lgan edi. Bu haqda blogimda ham yozganman. Ammo aynan Bezos bizni tabriklaydi, deb xayolimga ham keltirmagan edim. Bezos yonimizdan o‘tayotganda biz unga uzukni ko‘rsatdik. U esa: ‘Baxtli bo‘ling!’ dedi. Shunday qilib, Amerikadan bizni birinchi bo‘lib tabriklagan inson Jeff Bezos bo‘ldi. Eng yaqin dugonamdan keyin, albatta. Tushlik biz uchun unutilmas tarzda o‘tdi”, deya xotirladi Tillayeva.
Ma’lumot uchun, Maryam Tillayeva O‘zbekistonning birinchi prezidenti Islom Karimovning nabirasi, Lola Karimova-Tillayeva va Timur Tillayevning qizi. U 1999-yil 20-yanvarda Toshkentda tug‘ilgan. Yoshligidan musiqa bilan shug‘ullanib, fortepiano va gitara chalishni o‘rgangan, sahnada kuylagan. 14 yoshida AQSHga ko‘chib o‘tgan va Boston shahridagi Northeastern University’ni tamomlagan.
Maryam hozirda ijtimoiy tarmoqlarda bloger, ekofaol va ayollar huquqlari himoyachisi sifatida tanilgan. U You Swish nomli shaxsiy kiyim brendiga asos solgan. Shuningdek, okean tozaligi va ayollarni zo‘ravonlikdan himoya qilish kabi bir nechta ijtimoiy loyihalarda qatnashgan. 2021-yilda u rossiyalik bloger Amiran Sardarovga turmushga chiqqan, biroq bir yil o‘tib ajrashgan. U ajrim sababini ruhiy bosim va sog‘lom bo‘lmagan munosabatlar bilan izohlagan.
Izoh (0)