Munisa Rizayeva Instagram’dagi sahifasi orqali muxlislariga ota-onasining holidan xabar olgani hamda ular bilan nimalar haqida suhbatlashgani aks etgan videosini namoyish etdi. Xonandaning onasi Dilorom Bo‘rixo‘jayevaning aytishicha, u tug‘ilganidayoq xonanda bo‘lishini aytishgan.
Onasining so‘zlariga ko‘ra, homiladorligining sakkizinchi oyida kechasi to‘satdan qon ketgan. Turmush o‘rtog‘i tez yordam chaqirgan va ular shoshilinch tarzda shifoxonaga yo‘l olgan. Shifoxonaga yetib kelishgach, G‘ulom ismli yaqin tanishlari professorni chaqirtiradi. Professor ertalab soat 6:00 larda kelib, homilani tekshiradi va “bola o‘lgan, yurak urishi yo‘q” deya tashxis qo‘yadi.
Biroq Munisaning onasi bu tashxisga qaramay, “bola o‘lgan bo‘lsa ham, uni o‘zim tug‘aman”, degan. Shundan so‘ng u butun kun shifokorlar nazoratida ukollar va dori-darmonlar yordamida tug‘uruqqa tayyorlangan. Kechga yaqin esa, u qizini sog‘-salomat dunyoga keltirgan.
Sen tug‘ilayotganingda baqirib yig‘lay boshlagansan. Mening ikki dugonam Feruza va Lola baxtimga o‘sha kuni navbatchi ekan. Ularning birinchi aytgan gaplari shu bo‘ldi: “Dilka, qizing qo‘shiqchi bo‘ladi”. Men esa “Bo‘lishi mumkin emas” dedim. Ular esa “Ko‘rasan, qizing qo‘shiqchi bo‘ladi, hali tug‘ilib ulgurmasidan bor ovozda baqiryapti” dedi. O‘sha paytda bu men uchun haqiqiy mo‘jiza edi. Hali ham shunday bo‘lishi mumkinligiga ishongim kelmaydi, deydi aktrisaning onasi.
Munisa Rizayevaning san’atga bo‘lgan qiziqishi bolalikdan boshlangan. Onasi uni yoshligida turli to‘garaklar va madaniy tadbirlarga olib borar, bu esa qizning iste’dodini rivojlantirishga yordam bergan. Biroq qo‘shiqchi bo‘lish istagi paydo bo‘lganda, otasi bu qarorga osonlik bilan rozi bo‘lmagan.
Qo‘shiqchi bo‘lmoqchi ekaningni aytganingda ikkita do‘stimni taklif qildim. Ularning ikkalasi ham xalq artistlarining farzandlari edi. Ular seni san’atkor bo‘lishingga meni ko‘ndirishgan. O‘shanda nima deganim esingdami? “Munisa, notalarni bilasanmi?”, Sen “yo‘q” deb javob bergansan. Men sendan biror ariyani ijro eta olasanmi deb so‘raganimda sen bunga ham “yo‘q” deb javob bergansan. Shunda men quyidagicha shart qo‘ydim: Agar sen qo‘shiqchilik bilan jiddiy shug‘ullanmoqchi bo‘lsang, o‘qishing kerak. Shundan so‘ng men istalgan vaqt o‘qishing uchun pul to‘lashga tayyorligimni aytdim, deydi aktrisaning otasi.
Shundan so‘ng xonanda konservatoriyaga kiradi va o‘qishini Londonda davom ettiradi.
Izoh (0)