44 yoshli xonanda va aktyor Jastin Timberleyk “Forget Tomorrow” nomli dunyo bo‘ylab gastrol safarini 30-iyul kuni Turkiyaning Istanbul shahrida bergan konsert bilan yakunlagach, Laym kasalligiga chalinganini e’lon qildi.
Laym kasalligi bakterial infeksiya bo‘lib, odatda tropik kanalar chaqishi orqali yuqadi. Bu kasallikni asosan Borrelia burgdorferi deb nomlangan bakteriya keltirib chiqaradi. Xastalik mushak og‘rig‘i, bosh og‘rig‘i, xotira va ong faoliyatida buzilishlar, bo‘g‘imlar shishishi, charchoq va boshqa noxush simptomlar bilan kechadi.
Kasallik ilk bor 1970-yillarda AQSHning Laym shaharchasida aniqlangan va shu sababli uning nomi shunday qo‘yilgan. Bakteriya odatda o‘rmonli, butazorlarga boy hududlarda, ayniqsa bahor va yoz oylarida ko‘proq tarqaladi.
“So‘nggi konsert dasturim eng quvonchli, hissiyotlarga boy, ammo jismonan qiyin va charchatadigan tajriba bo‘ldi. Men oilam, do‘stlarim va sizlarning yordamingizsiz buni yengib o‘tolmas edim. Chunki so‘nggi oylarda sog‘lig‘im yomonlashdi va men Laym kasalligiga chalinganimni bildim. Buni sizlarning hamdard bo‘lishingiz uchun emas, balki boshimdan kechirganimni ochiq so‘zlab berish uchun aytyapman”, dedi Timberleyk.
Xonanda gastrol safari davomidagi izchil davom etgan ishlar kasallik alomatlarini yana kuchaytirib yuborganini aytdi:
“Agar siz yoki yaqinlaringiz shu dardga chalingan bo‘lsa, hayotning bu kasallik bilan o‘tishi ruhiy va jismoniy jihatdan chidab bo‘lmas darajada og‘ir ekanligini yaxshi bilasiz. Menga ilk bor tashxis qo‘yilganda shok holatida edim. Hech bo‘lmasa shundan keyingina nega sahnaga chiqqanimda kuchli og‘riqlar, charchoq va ko‘ngil aynishi boshlanishini tushuna boshladim”, deydi Gollivud yulduzi.
To‘rt karra “Emmi” va to‘qqiz karra “Gremmi” sovrindori bo‘lgan Timberleyk avvaliga bir yil davom etadigan gastrol safarini bekor qilishni o‘ylagan, ammo keyinchalik bu sinovga bardosh berishga qaror qilgan:
“Sahnada qo‘shiq kuylash davomida olgan zavqim kasallikdan kuchliroq bo‘ldi. Men taslim bo‘lmaganimdan xursandman. Bu orqali o‘zimga sabrli ekanimni isbotladim”, qo‘shimcha qildi xonanda.
“Social Network” filmida suratga tushgan aktyor aslida tashxisni oshkor etmoqchi bo‘lmagan, chunki bolaligidan shaxsiy hayotni sir saqlashga o‘rgangan. Biroq uni to‘g‘ri tushunishlari uchun bu haqda gapirishga qaror qilgan.
Bu bayonot san’atkorning Ruminiyada bo‘lib o‘tgan Electric Castle musiqa festivalidagi chiqishi vaqtida muxlislari tomonidan keskin tanqid qilinganiga javoban berildi. Chunki avvalroq internet foydalanuvchilari “Nega u konsertga yuzaki qarayapti?”, “Qo‘shiqdagi nechta so‘zni o‘zi kuyladi?”, “600 dollar to‘lab, Jastin Timberleyk qo‘shiqlari o‘rniga odamlar kuylayotganini tomosha qildik” kabi tanqidiy fikrlarni bildirgan edi.
- Eslatib o‘tamiz, supermodel Bella Hadid va uning onasi Yolanda, qo‘shiqchi Jastin Biber, aktyorlar Ben Stiller hamda Emi Shumer ham Laym kasalligiga chalingan.
Izoh (0)