“Disney mo‘jizasi” deya tanilgan ko‘plab multfilmlarning yaratilish jarayoni ortida kurash, kasbiga fidoyilik va hatto adolatsizlikka to‘la voqealar yashiringan. Quyidagi faktlar esa hozirgacha keng ommaga noma’lum bo‘lib kelgan.
“Oppog‘oy”ga ovoz bergan aktrisaning karyerasi Disney sababli barbod bo‘lgan
Uolt Disney “Oppog‘oy va yetti gnom” multfilmini yaratish rejasini e’lon qilganida Gollivuddagi ko‘plab prodyuserlar buni kulgili g‘oya deb hisoblashgan, chunki u to‘liq metrajli, 80 daqiqa davom etadigan animatsion film bo‘lishi kerak edi. O‘sha paytda bunday g‘oya ko‘pchilikka yot va besamar tuyulgan.
Disney tanqid va shubhalarga qaramay, o‘z rejasidan voz kechmadi: loyihaga butun jamg‘armasini sarfladi, hattoki uyini garovga qo‘ydi. Mablag‘ tugagach esa, bankirlarni ishontirib, qo‘shimcha kredit olishga muvaffaq bo‘ldi.
Bu multfilmga oid yana bir qiziqarli, ammo achinarli fakt bor. Bosh qahramon Oppog‘oyga ovoz bergan Adriana Kaselottining ismi titrlarda umuman tilga olinmagan. Multfilm chiqqach, uning aktrisalik faoliyati muvaffaqiyatsizlikka uchragan. Radioeshittirishga uni taklif qilishmoqchi bo‘lishganda, Disney bunga qarshi chiqib: “Kechirasiz, lekin bu ovozni boshqa hech qayerda ishlatib bo‘lmaydi. Men Oppog‘oy obrazining sehrini buzmoqchi emasman”, deya qat’iy turib olgan.
“Shrek” ustida ishlagan animatorlar loyda cho‘milgan
“Shrek” multfilmi ustidagi ishlar bir necha yil davom etgan, birgina animatsiyaning o‘ziga to‘rt yil vaqt ketgan. Yaratilgan mahsulotning har bir detali mukammal chiqishini xohlagan animatorlar loyli hammomga tushib, o‘z tanasida qalin, yopishqoq massa qanday harakatlanishini kuzatishgan. Bu tajriba Shrek botqoqda cho‘milayotgan sahnani realroq chizish uchun yordam bergan. Natijada multfilmning eng esda qolarli va kulgili epizodlaridan biri tarixda qolgan.
Robin Uilyams Disney’dan ranjigan
Mashhur aktyor Robin Uilyams “Olovuddin” multfilmida Jin obraziga ovoz bergan. Ammo Disney kompaniyasi bu ovozdan aktyorning roziligisiz boshqa maqsadlarda, xususan, fastfud do‘konlari va boshqa savdo nuqtalarida reklama vositasi sifatida ishlatgan. Reklamalardan tushgan daromaddan Robin Uilyams umuman foyda olmagan.
Aktyor bunga jiddiy norozilik bildirgan va studiya bilan munosabatlari ancha sovuqlashgan. Vaziyat shu darajaga yetganki, Disney studiyasi omma oldida undan kechirim so‘ragan va murosa belgisi sifatida unga Pablo Pikassoning qiymati 1 million dollardan ortiq bo‘lgan san’at asarini sovg‘a qilgan.
“Muzyurak”dagi Elza dastlab yovuz obraz bo‘lgan
Disney “Qor malikasi” ertagini ekranlashtirish g‘oyasini ilk bor 1930-yillarda ko‘rib chiqqan. Dastlabki variantda bosh qahramon Elza sovuq fe’lli, ko‘k va kalta sochli, yovuz qirolicha bo‘lgan. Ammo ishlab chiqarish jarayonida “Let It Go” qo‘shig‘i yozilgach, bunday musiqa uchun bosh qahramon ezgu niyatli bo‘lishi lozim, deya Disney ijodiy jamoasi fikrini o‘zgartirgan. Ular samimiy, kuchli va ozodlikni tarannum etgan qo‘shiqni yovuz qahramon aytishi mantiqsiz deb hisoblab, Elzaning obrazini ijobiy tomonga o‘zgartirishgan.
“Moana”ning aksariyat sahnalari omborda suratga olingan
“Moana” multfilmida faqat bitta detal — Mavining tatuirovkalari qo‘lda chizilgan. Qolgan barcha sahnalar zamonaviy kompyuter animatsiyasi va harakatlarni aniqlovchi texnologiyalar yordamida yaratilgan. Bu animatsiyalarni suratga olish ishlari esa oddiy kinostudiya emas, balki Shimoliy Gollivuddagi ulkan omborxonada amalga oshirilgan.
Qiziq jihati shundaki, “Moana” bu borada Disney’ning yana bir mashhur filmi — “Suv parisi” bilan o‘xshashdir. 1989-yilda yaratilgan ushbu multfilm ham Kaliforniyaning Glendale shahridagi omborda suratga olingan.
“Qirol sher” multfilmi aslida ikkinchi darajali loyiha hisoblangan
1990-yillarda Disney bir vaqtning o‘zida ikki loyihani ishlab chiqqan: biri “Qirol sher”, ikkinchisi esa “Pokaxontas” bo‘lgan. Ko‘pchilik animatorlar insoniy his-tuyg‘ular va tarixiy asosga ega “Pokaxontas” ko‘proq muvaffaqiyat qozonadi deb ishonib, shu film ustida ishlashni afzal ko‘rgan. “Qirol sher” esa hayvonlar haqidagi “soddaroq” loyiha sifatida ko‘rilgan va kamroq e’tibor qaratilgan.
Hatto studiya xodimlaridan biri: “Bunday narsani kim ham ko‘rar edi?” degan fikrni bildirgan. Biroq vaqt o‘tib, aynan shu animatsion film Disney tarixidagi eng muvaffaqiyatli loyihalardan biriga aylangan va muxlislar tomonidan sevib tomosha qilinadigan klassikaga aylangan.
“Uollas va Gromit” tufayli deyarli bankrot bo‘lgan pishloq zavodining biznesi saqlab qolingan
Multfilmda Gromit ismli kuchuk “Wensleydale” nomli pishloqni yaxshi ko‘radi. Animatorlar bu pishloq nomini shunchaki qiziq eshitilgani uchun tanlagan, biroq multfilm ommalashgach, bu kichik brendga bo‘lgan qiziqish keskin oshgan va savdo hajmi bir necha barobar ko‘paygan.
Haqiqiy hayotda “Wensleydale” pishlog‘i ishlab chiqarilishi deyarli to‘xtab qolgan edi, ammo multfilm sabab zavod qayta oyoqqa turgan. Shunday qilib, tasodifiy tanlov deyarli yo‘q bo‘lib ketayotgan an’anaviy pishloq ishlab chiqaruvchisini qutqarib qolgan.
“Nemoni izlab” multfilmi animatorlari dayvingni o‘rganishga majbur bo‘lgan
Pixar rejissyori Endryu Stenton bolaligida stomatologga borganida klinikadagi akvariumni kuzatishni yaxshi ko‘rardi. U akvariumdagi baliqlar aslida okeanga — uylariga qaytishni xohlashadi, deb o‘ylardi. Ehtimol, “Nemoni izlab” kartinasining g‘oyasi aynan shu bolalik xayoli asosida tug‘ilgandir.
Film qahramonlarining harakatlari ishonarli chiqishi uchun animatorlar ekspress-biologiya va okeanologiya kursini o‘qishgan. Ular suvga sho‘ng‘ish (dayving) mashg‘ulotlarida qatnashib, ixtiolog (baliqlarni o‘rganuvchi mutaxassis)ning maxsus ma’ruzalarini ham tinglashgan.
“Hayvonlar shahri” butunlay boshqacha multfilm bo‘lishi mumkin edi
Multfilm uchun ssenariy tanlanayotgan ilk bosqichda olti xil syujet ko‘rib chiqilgan, ularning faqat uchtasi hayvonlar obraziga asoslangan edi. Tasavvur qiling: biz “Hayvonlar shahri” o‘rniga “Uch mushketyor”ning hayvonlar ishtirokidagi talqinini yoki koinotda yashovchi mops-ovchining sarguzashtlarini tomosha qilishimiz mumkin edi.
“Ratatuy”ni suratga olishda haqiqiy oshpaz yordam bergan
Mazali va ishonarli ko‘rinadigan taomlarni tasvirlashda Pixar jamoasiga dekoratsiya va maketlar bo‘limi menejeri Maykl Uorch yordam bergan. U Pixar’da ishlashidan oldin kulinariya akademiyasini tamomlagan professional oshpaz bo‘lgan. Multfilm uchun zarur bo‘lgan barcha taomlarni aynan u o‘zi tayyorlagan.
Aytgancha, film boshida kalamushlar titkilayotgan bir uyum axlat kadrlarini eslaysizmi? Rassomlar uni chizishdan oldin 15 turdagi mahsulotning chirish jarayonini suratga olishgan. Aynan shu suratlar asosida chiqindi uyumi realistik ko‘rinishga ega bo‘lgan.
Izoh (0)